Vawiina thuthar lakhawmtute a kawmnaah Pu Thangmawia hian, tun hnaia Speaker hova Party hrang hrang MLA-te inrawnkhawmnaah MLA-te chu an hlawh zaa 30 thawh tura rel a ni a, hetah hian Minister-te chu cheng sing 1 leh sang 5 thawh belh zel tura tih an nih laiin, Minister-te hian an hlawh zaa 30 thawh aiah zaa 50 thawh hi an remti tih a sawi. Pu Thangmawia hian, Covid 19 do nana MLA-te hlawh thawh rel a nih chungchangah lungrual taka thu tlukna siam a nih laiin Mizorama la hriat ngai loh Speaker bang tura nawrna hial a thleng chu pawi a tih thu a sawi.
Covid 19 donaah hian Speaker hmalakna avangin MLA-ten lungrual takin hma an la ho niin Pu Thangmawia hian a sawi a, Chief Minister thu angin MNF MLA-te chu Phone hmanga a biak vek thu leh an hlawh atanga Covid dona tur thawh chu an remtih tlan thu a sawi a, Speaker hian Party mal anga hma lo lak bik chu a rualkhai loh palh a hlauh avangin Party dang MLA-te biakrawn leh an ni a, tun dinhmun hi a thleng ta a ni, a ti.
MNF Legislature Party Secretary hian, MLA hlawh thawh chungchang relnaah Congress MLA-te an tel loh avangin an hmalak dan tur lo rel sak chu thil remchang a ni lo a, hetihrual hian CLP Leader-in a lo sawi tawh angin, hlawh pek chungchang hi an tihhlawhtlin ngei an beisei tih a sawi.
Pu L Thangmawia hian Covid 19 do kawngah Mizoram chu a ti tha pawl a ni a ti a, State dang CM thenkhat chuan Sorkar hnathawk hlawh pek tur an neih loh thu an puan tawh hial laiin Mizoramah chuan Sorkar hnathawk hlawh pek theih loh tur thu sawi rik a la ni lo a, pe thei zel tura an la inngai thei chu a lawmawm hle a ni a ti.
