Mumbai Mizoram house-ah hian thawktute tiam lovin damlo leh an mahni awmpuitu mi 47 an awm mek a, cancer vanga inenkawl mek, nu pakhat chu damdawiin-a a luh dawna enfiahnaah coronavirus a kai tih nimin khan hriat chhuah a ni a, sorkarin kalphung pangngai a neih sa angin, he nu pakhat hi amah awmpuitu a pasal nen a hranga enkawl nghal an ni.
Health Minister Dr R Lalthangliana sawi danin coronavirus kai hi St George Hospital, Mumbai-ah admit a ni a. Tun thlengin coronavirus natna lan chhuah dan ang, symptoms a lang rih lo a, ICU atangin ward ah sawn a ni ang a. A sample hi lak nawn a ni a, test leh mek a ni.
Chief Secretary Pu Lalnunmawia Chuaungo chuan Mumbai-a sawrkar hotute leh Mizoram House enkawltute a be nghal tih Health Minister hian a sawi a. Mumbai Mizoram House pawh nimin vek khan damdawi hmanga kah thianghlim nghal a ni a. House-ah hian cancer vei damlo 16 leh anmahni enkawltu 32, an vaiin mi 48, an awm mek a, vawiin khan Mumbai Municipal Corporation a health lama thawktuten endikin, damlo awm zawng zawng bakah COVID-19 vei hmuhchhuah tak awmna dormitory a awm zawng zawngte sample 22 test turin an la a, sample lakte leh damlo awmpuitute zingah tun dinhmunah COVID-19 natna nei anga lang an awm rih lo a ni.
Health Minister Dr R.Lalthangliana hian vawiin tlai khan Tata Memorial Hospital, Mumbai Director Dr CS Pramesh chu a be nghal a, tuna Mizo cancer vei dangte sample test tura lak mek hi an result nghah chhuah a ni ang a, an result a zirin Tata Memorial Hospital-a treatment an lak chhunzawm dan tur ngaihtuah a ni dawn tih a lo hrilh a ni.
Mumbai-a COVID-19 vei damlo pasal pawh COVID-19 kai ve anga thuthang awm chu Health Minister hian thu diklo a ni tih a sawi a, tun thlengin test \ul an la ti rih lo a, a \ul dan a zira test chauh tur a ni a ti a. Fimkhur thuhlaah March ni 15 hnu lama Mumbai Mizoram House chhuahsana, Mizorama rawn haw mi 11 te chanchin pawh Mizoram sorkar chuan a ngaihven zui nghal a, tun dinhmunah hlauhthawn tur a awm lova, heng mite hi anmahni awmna \heuhah kar khat chhung home quarantine a awm rih tura hriattir an ni tih Dr R Lalthangliana hian a sawi.
Mumbai Mizoram House-a Deputy Resident Commissioner-in zonet zawhna a chhan danin, Mumbai Mizoram house hi tlawh pawh theih rih loh tura khar rih a ni.
