He inkhawm MZP Pisa Conference Hall-a neih hi an pawl Vice President, Pu Vanlaltana’n a kaihruai a, MZP President hlui, Rural Development Minister Pu Lalruatkima, School Education Minister, Pu Lalchhandama Ralte, General Secretary hlui, Pu L. Thangmawia MLA, Law Minister Pu TJ Lalnuntluanga, Legal Adviser leh Ececutive Committee Member hlui leh Executive Committee member hlui, Pu Lalrinsanga Ralte MLA te chu MZP puanbah leh lawmpuina thuziak an hlan a ni.
MZP President, Pu L. Ramdinliana Renthlei chuan tunhnaia Mizoram Assembly inthlanpui neih zawh takah an hruaitu hlui mi 5 an tling leh an zinga mi 3 zet Minister an ni thei chu an lawm hle tih a sawi a. MZP chu a din tirh a\anga vawiin thlenga pawl nung tak a ni thei chu an hruaitu hluite thawhrah a ni tih sawiin, tun term kal laiah kum danga an la tih ngai loh ‘Remna ni’ hman \an a ni a, hei hi tun hnu zelah pawh chhunzawm a nih a beisei tih a sawi.
Pu L. Ramdinliana Renthlei chuan an hruaitu hmasate hmalakna zara ramri chungchanga an hnathawh sorkar laipui beng a thleng ta chu thil lawmawm tak a ni, a ti a, ramri chungchangah hian tuna an hruaitu hlui MLA 5-te zarah chak leh zuala hma an lak theih an beisei tih a sawi.
Lawmpuina an pek zinga mi MZP President hlui, tuna Minister ni ta Pu Lalruatkima chuan MZP pumchhuak an nihna chu kawng engkima lantir an tum thu leh midang aia thawkrim chunga ram rawngbawl zel an tum thu a sawi a. Hnahthel ro anga tla bo mai lovin, Zoram tana fa hrin duhawm ni tura \an an lak tur thu a sawi. Pu Lalruatkima chuan khawvel hmun hrang hranga cheng Zo hnahthlak inpumkhatna chu an duhthusam a la ni reng tih sawiin, rorelna pakhat hnuaia awm chu an duh ber a ni la ni reng tih a sawi bawk.
MZP President hlui, Pu Lalchhandama Ralte Minister pawhin MZP hruaitu hlui a nih bakah School Education Minister a nih angin zirlaite tan theihtawp chhuah a tum thu a sawi a. MNF party-in zirlaite tana Policy hrang hrang a duan tihhlawhtlin kawngah finchhuah zel turin a sawm bawk.
Law Minister, Pu TJ Lalnuntluanga pawhin MZP hmalaknaa eiruk dona tur, Lokayukta din turah a ruangam puahchah mek a ni tih sawiin, rei loteah hman theiha peih fel theih beisei a ni, a ti a. Ramri chungchanga MZP hmalaknaah Forest Minister a nih anga \angkaina a nei a nih chuan theihtawp chhuaha \anpui a inhuam thu a sawi bawk. He inkhawmah hian MLA pahnih Pu L. Thangmawia leh Pu Lalrinsanga Ralte pawhin thu an sawi a. MZP Pisa hi kumin atan khar nghal niin, nakkum January ni 15-ah hawn leh a ni ang.
