Ram chhung hmun dang rualin vawiin khan Mizoram pumah National Voters’ Day vawi 8-na hman a ni. Mizorama a hmanna inkhawm lian ber, Aizawla Synod Conference Centre-a neihah Mizoram Larsap, Lt. Gen. Nirbhay Sharma chuan Mizoramah inthlanna dik leh fel fai a awm theihna tura kohhran leh tlawmngai pawlte hnathawh chu ram chhung hmun danga awm ve ngai lo a ni tih sawiin, khawvel ram dang pawhin hria se a duh thu a sawi a, tun thla ni 1-a kum tling chin, Electoral Roll-a thunna leh ennawnnaah mipa aia hmeichhe vote a tam zawk chunga inthlannaah mipa aia hmeichhe candidate an la tlem zawk chu \an lakna tur niin a sawi. He inkhawmah hian Persons with Disabilities Commissioner, Dr. Lalnunthara pawhin National Voters’ Day thupui atana thlan, inthlanna mipuite ban phak tih thupuia hmangin pianphunga rual ban loten an chanvo an chan a pawimawh thu a sawi a, Chief Electoral Officer, Pu SB Shashank pawhin thusawiin, kumina Mizoram Assembly inthlanna turah vote thlakna dik tak enfiah theihna, Voter Verifiable Paper Audit Trail (VVPAT) hman tum a nih thu a sawi a ni. He inkhawmah hian Chief Election Commissioner, Pu Om Prakash Rawat-a thuchah ngaihthlak a ni a, BLO leh AERO hnathawk \hate lawmman pek an ni bawk.
——————-
Lungleiah chuan he ni hi Convention Centre-ah hman a ni a, Bawrhsap, Pi Lalzarmawii’n ram khua leh tui dik tak, kum tling chin zawng zawngte kim taka Electoral Roll-a thun a \ul thu te, chung mite chuan inthlannaah an aiawha rorel tur an thlan a pawimawh thu te a sawi a ni. He inkhawm hi Election Officer, Pu James Lalnithanga’n a kaihruai a, vote nei tharte hnenah EPIC sem a ni bawk.
———————
Siahaah pawh DC Conference Room-ah he ni hi Bawrhsap, Pi Harleen Kaur-i hova hman a ni a, Bawrhsap chuan ram khua leh tuiten rilru fim tak hmanga roreltu tur thlanga vote an thlak a pawimawh thu a sawi. He inkhawmah hian Palak leh Saiha biala BLO hnathawk \ha thlan chhuah chu chawimawina thuziak leh tangkaifai Rs.3,000/-ve ve pek an ni.
————-
Lawngtlaiah chuan Bawrhsap Office kawtah Dist. Bawrhsap, Dr. Arun T. hovin he ni hi hman a ni a, Bawrhsap chuan ram khua leh tui dik tak, kum 18 tling tawh zawng zawngte chu Electoral Roll-a inthuna, inthlannaa vote thlak vek tur a nih thu a sawi. He inkhawm hi Election Officer, Pu Lalrinawma’n a kaihruai a, Chief Election Commissioner, Om Prakash Rawat-a thuchah chhiar chhuah a ni.
—————–
Serchhip-ah chuan he ni hi Bawrhsap, Pi Sangchhin Chinzah hovin DC Conference Hall-ah hman a ni a, Bawrhsap chuan zalenna awm lohna ram, tihluihnaa inawpna ram hrehawmzia te, zalen taka mipuiten an aiawha roreltu tur an thlan theihna ram nawmzia te sawiin, vote thlak thei chin zawng zawngten Electoral Roll-a inthuna vote an thlak a pawimawh thu a sawi a ni. He inkhawmah hian Booth Level Officer hnathawk \hate chawimawina pek a nih bakah vote nei tharte EPIC pek an ni bawk. He inkhawm hi Election Officer, Pu Abraham Beirazi Khithie-in a kaihhruai a ni.
——————–
Champhaiah chuan National Voter’s Day hi Kahrawt Community Hall-ah Bawrhsap, Pu Vanlalngaihsaka hova hman a ni a, Bawrhsap chuan tun thla ni 1-a kum 18 tling chinte thuna, Electoral Roll thar siam a nih thu te, vote nei zawng zawngten dik taka vote an thlak a \ul thu te a sawi a ni. He inkhawmah hian Chief Election Commissioner, Om Prakash Rawat-a thuchah thuchah ngaihthlak a nih bakah inthlanna dik leh fel fai nei turin thu an tiam a ni.
——————-
Kolasib-ah chuan National Voter’s Day hi DC Conference Hall-ah hman a ni a, Bawrhsap, Pu R. Zarzosanga chuan ram hruaitu tur thlannaah mahni chhia leh \ha hriatna dik taka hmanga vote thlak a \ul thu te, ram khua leh tui kum tling chin tan Electoral Roll-a inthuna vote thlak a \ul thu te a sawi.
——————–
Mamit-ah pawh he ni hi I&PR Conference Hall-ah Additional DC, Pu Jacob Lalawmpuia hova hman a ni a, Additional DC chuan vote nei tharte tan an chhiat leh \ha hriat dik taka hmanga inthlannaa vote thlak a pawimawh thu te, kum tling chinte chu Electoral Roll-a thun vek an \ul thu te a sawi a ni. He inkhawm hi Election Officer, Pu J. Miahlung-in a kaihruai a, bial hrang hranga BLO hnathawk \hate chu chawimawina hlan an ni bawk.
