NEEPCO leh NHPC Limited ten hel ho laka venhimna phut

Kawlphetha siamtu company pahnih – NEEPCO leh NHPC Limited-in hel ho laka ven himna an phut. Sorkar laipui hnuaia heng company pahnih – North Eastern Electric Power Corporation Ltd. leh NHPC Limited hian ULFA hel pawla sorkar nena inbiak duh lote hnen atangin Assam-a an hnathawh chu thla 6 chhunga titawp vek tura hriattirna leh, hemi hnu-ah hian hna an la thawh zui chuan ralthuam leka vauna an dawng nia sawiin, Assam Police-te chu an company leh an hnathawktute veng turin an ngen a, ULFA ho hian tualchhung mi, heng company mi chhawrte pawh bang vek tur leh, hna thawh tur dang zawng turin an hriattir niin an sawi. ULFA hel pawla sorkar nena inbiak duh lo lam hian NEEPCO-in Ranganadi project an thawh atanga tui an sah chu kumina he state-a tui len chhan leh mi 158 thih chhanah an puh a ni. Assam Police Addl. DG (special branch), Pallab Bhattacharya chuan, NEEPCO leh NHPC Limited hotute hian Thawhlehni khan an thu dawn chungchang hi Assam Police hotu liante an sawipui niin a sawi a, an hnathawhna hmun leh thawktute dinhmun pawh Police ten an chinchhiah vek a, Police hotute chuan sorkarah he thil hi thlenin, company pahnih leh thawktute ven hi an rawt tawh a, sorkarin rem a tih chuan heng company-te hnathawhna hmun – Dibrugarh, Lakhimpur leh Tinsukia district SP ten a tul danin an bawhzui dawn niin a sawi. NEEPCO hian Assam leh hmarchhak bial hmun hrang hrangah hna a thawk a, NHPC hian Assam leh Arunachal Pradesh ramri bulah Subansiri lui a khuap mek bawk a ni.