CM, Pu Lal Thanhawla sawmna angin NGO Co-ordination Committee hruaituten vawiin khan CM Office-a Cabinet room-ah CM an kawm a, he Committee Chairman, Pu Lalbiakzuala hnen atanga thu dawn danin, CM chuan Citizenship (Amendment) Bill, 2016 chu Mizoram sorkarin a duh loh thu, hemi buaipuitu, Joint Parliamentary Committee Chairman, Pu Satyapal Singh hnenah ziakin vawiin khan a thawn tih a lo hrilh a, Medical course zir tura Mizoram quota tihtlem a nih chungchanga sorkar laipui hotute dawr turin vawiin khan Higher & Technical Education Minister, Pu R Romawia leh Secretary, Pu Benjamin-a’n New Delhi an pan thu leh, Minister of State, Dr BD Chakma-a banna thehluh chu a pawm dawn leh dawn loh, engmah a sawi theih rih loh thu a lo hrilh niin a sawi. An inkawmnaah hian NGO Co-ordination Committee hruaitute chuan party leh tlawmngai pawl tin aiawhte chu Citizenship (Amendment) Bill, 2016 chungchang ngaihtuahtu Committee Chairman hmu tura intirh a, he bill an duh loh thu leh tha an tih loh thu hmai chhana hrilh leh lehkha thehluh thaa an hriat thu te, MBBS seat tihtlem a ni chu pawi an tih thute pawh CM chu an hrilh bakah, Dr BD Chakma banna thehluh, pawm leh pawm loh thu-ah pawh beiseina sang tak an neih thu, CM chu an hrilh a, Minister ban chungchangah hian NGO Co-ordination Committee-in tun thla ni 25 thleng, sorkar an ngaihchanna chu a la din reng tih pawh an hrilh a ni.
