Vawiin khan NGO Coordination Committee chu Central YMA Committee room-ah an thu khawm a, Dr. BD Chakma, Minister of State a nihna atanga ban tura July ni 27-a CM an ngenna chu bawhzuina engmah a awm loh avangin tun thla ni 25 thleng ngaihchan ni se, hemi hnuah hian a tul dan anga na zawka nawr ni se an ti. Central YMA President, Pu Lalbiakzuala kaihhruaia NGO Coordination Committee thu khawm chuan, Dr. BD Chakma, bang tura an nawrna chungchangah hian tun thla ni 25 hnua bawhzuina a la awm lo cheu a nih chuan thil tih zui dan tur ngaihtuahin tun thla ni 26-ah thut khawm leh ni se an ti a, a tul chuan ram pumah kawng zawh leh total bandh huaihawt ni se an ti bawk. NGO Coordination Committee chuan kum 2014-a CADC huam chhung, Borapansuri-a MZP-in Zofate chawlhbuk sak a tum khan Dr. BD Chakma thil tih avang hian MZP Hqrs. Lunglei hruaitute chu chhan mumal awm lovin Mizoram Police-in an man a, Zofate chawlhbuk sak tum hi Chakma mipuiten an dodalna lantir nan Chakma NGO hrang hrangten Boranpunsi MDC Bye Election an boycott a, hemi chungchanga an inhmuh khawmnaah pawh khan Dr BD Chakma hi a huaihawttu ber niin an sawi bawk a, Minister of State atana lak luh a nih tuma ram tana thawk tur leh dik tak leh rinawmna taka hnathawk tura a intiam chunga sorkar thiltih tithuanawp zawnga inthlan boycott tute zinga a tel chu Joint NGO chuan a ngaithiam lo hle tih an sawi a, Minister ni zui tlaka an ngaih loh thu an sawi a ni.
