Secretariat Administration Dept.-in zawhna a chhan danin, lirthei lei thar 24 te zingah hian Chief Minister hman tur, Jeep Compass chu a man a sang ber a, cheng nuai 25 sing 5 sang 6 man a ni.
Minister Official Car-a hman tur Verna Car 11 lei a ni a, car pakhat hi cheng nuai 11 sing 9 sang 7 bawr zel a ni a, support car-a an hman tur Scorpio 11 leh Duster 1 lei a ni bawk a, Scorpio hi pakhat cheng nuai 16 sing 8 man vel a nih laiin Duster hi cheng nuai 12 sing 3 sang 7 man vel a ni.Verna Car 4, Duster 1 leh Scorpio 11 te hi Nikum March thlaa lei kha a ni a, Jeep Compass leh Verna p7 te chu nikum October thlaa lei a ni thung.
Secretariat Administration Dept. hian lirthei thar lei a nih chhan hi Chief Minister leh Minister te motor hman chu sorkar hmasa hunlaia lo hman tawh, duh anga \ha tawk tawh lo a nih vang a ni a ti a, motor hlui te chu Secretariat-a officer motor dawng thei chinin an mamawh dan azirin an rochung tih a sawi.
Lirthei thar lei tur hian GAD ah phalna lak a nih hnuah Departmental Vehicle Purchase Board kaltlanga lei a ni tih SAD chuan a sawi a, nikum March thlaa lei te chu Restricted tender hmanga lei a nih thu zawhna chhannaah a tarlang bawk a ni.
Hetihlai hian nikum November thla khan Council of Minister \hukhawm thurel bawhzuiin sorkarin lirthei thar lei tawh lova, mimal ta man chawia hmanna tur thupek thar siam a ni a, hei hi sorkar sum renchemna tura hmalakna a nih thu sokar thupek siamah hian tarlan a ni.
The Government of Mizoram, Vehicles Outsourcing Policy, 2019 hi November ni 19 ah hman \an a ni a, he policy hnuaiah hian venhimna lam kaihhnawih, high security office ang chi te, Secretary chin chunglam te, VIP Protocol lirthei te, District bawrhsap leh SP te tih loh Dept dang zawngin lirthei thar an lei khap a ni a, sorkar hnathawk pay grade-a level 13 chin chunglam te chu lirthei an hire-na turin thlatin cheng sing 3 sang 5 pek an ni ang a, level 12 chin hnuailam-ah chuan pool vehicle tiamin cheng sing 3 chinin lirthei hi hire sak tur an ni thung a, rate hi Chief Minister-in \ha a tih chuan tih danglam theih tur a ni tih sorkar thupek siamah hian tarlan a ni.
