ZMC-ah hian sample 248 endik atangin hri kai thar 5 hi hmuh bleh a ni a, chungte chu mipa 4 leh hmeichhia 1, kum 20 atanga 39 inkar an ni. An zinga 3 chu Aizawl Dsitrict mi leh midang 2 chu Serchhip District mi an ni a, Mizo vek Karnataka, Uttar Pradesh, Bihar, Nagaland leh Tripura atanga lo haw an ni a. An vai hian inkhunghranna hmuna awm lai, natna lan chhuah dan nei lo vek an ni. Nimina hri kai 5 hmuh belhte nena Mizorama hri kai awm tawh zat chu 272 an tling ta a, hetihlai hian hri kai enkawl dam, damdawi in atanga chhuah tir 160 awm tawhin, hri kai zawng zawng atanga dam zat hi zaa 58.82 a ni a. Tun dinhmunah damdawi ina enkawl lai 112 an awm a ni.
Nimin khan Lunglei Civil Hospital Laboratory-ah sample 23 endik a ni a, an zinga 11 chu hri kai nena inhniahna nei an nih avanga hri an kai leh kai loh finfiah tura an dinhmun endik sak an ni a, heng mite hi an sample tum khat endik sak an lo ni tawh a , hri lakah an fihlim tih finfiah a ni. Nimina Lungleia sample endik zingah hian Pukpui Covid Care Centre-a hri kai enkawl lai BSF sipai 12 pawh an tel a, hri kai enkawl lai zinga 9 chu hri lakah an fihlim thei dawn niin a lang a, midang 3 erawh enkawl chhunzawm an la ngai rih dawn a ni.
