Salem veng Local Level Task Force Secretary, Pu K. Lalrinmawia hnen atanga thudawn danin, an veng dawra thil lei, hri kai tih finfiah hi Myanmar lam mi, Delhi lam atanga lo haw a ni a, Ningani khan R. Dengthuama Hall-ah a thleng a, Gate-a Security Duty paltlangin dawrah thil a lei tih hriat a nih avangin an veng chhungah amah nen inzawmna nei thei nia hriat te chu chhui zui nghal an ni a ti a, thil tha lo zawk thleng palh theih ven thawn thilah vawiin chhun dar 12 atang khan Salem veng pumah mipui pawn chhuah khap nghal a ni a. Hri kai hmuhchhuah-in thil a leina dawr neitute leh an hnimhnaih nia hriat zawng zawngte chu nizan atang khan an chenna in-a khung hran an ni.
Salem veng LLTF hruaitute chuan an venga pawn chhuah khap chungchangah hian sorkar be rawn chungin engkim ruahmanna fel tak hnuaia kalpui a ni tih an sawi a. Hri kaiin a hnimhnaih, rinhleh mi 15 chu karleh lamah an sample endik tura lak a ni dawn a, an dinhmun hriat a nih hma loh chu inkharkhip hi khauh taka kalpui a ni dawn tih an sawi. Salem veng LLTF hruaitute chuan inkharkhip an kalpui chhungin mipui, a bikin khawsak harsa zawkten ei leh bara harsatna an tawh loh nan ruahmanna siam a nih tur thu an sawi a, inkharkhip chhunga harsatna dang a thlen loh nan veng dang mipuite chu tha taka tawiawm turin an ngen a ni.
Salem vengin inkharkhip khauh zawka an kalpui chhung hian an veng patlang National Highway-a tlante chu ding khawmuang lova tlan tlang an phal a ni.
