Nirbhaya thubuaia thiam loh chantir, khai hlum tura an chungthu rel tawh mi 4, Vinay Sharma, Mukesh Singh, Akshay Kumar Singh leh Pawan Gupta te chu tun thla ni 22, Nilaini khian Delhi Tihar lung ina khaihlum turin Court chuan a rel a, amaherawh chu president hnena zahngaihna dil theihna an la neih avang hian ni 22 ah hian khaihlum an nih a rinawm rih loh thung.
Ningani khan Tihar lung in enkawltute chuan Mukesh Singh-a’n a chungchang ngaihtuah \ha tura a dilna tihfel a nih hma loh chuan khaihlum theih an ni lo tih an lo sawi tawh a ni.
Mukesh Singh leh Vinay Sharma ten dan anga an chungchang rel tawh, ngaihtuah \ha tura an dilna chu Supreme Court judge pangaten Thawhlehni khan an lo hnawlsak tawh a ni.
Nirbhaya nu chuan mi 4 te khaihlum hun chu tihkhawtlai zel a ni ang tih a hlauh thu sawiin, rorelna dik a hmuh theih nan kum tam tak court-ah a kal tawh tih sawiin, dikna chanvo an nei a nih chuan a fanu thihnaah rorelna dik an hmuh ve theih nan dikna chanvo a nei ve tho tih a sawi bawk.
Kum 2012 December ni 16 khan kum 23 mi, medical student hmeichhe pakhat, Nirbhaya tia a hming vuah zui tak hi misualten pawngsual rawnin an sawisa a, South Delhi kawngpuiah an hnutchhiah zui a ni. Hemi hnu hian Nirbhaya chu Singapore damdawi inah enkawl a ni a, December ni 29 khan a hliam tuar lovin thi a ni.
Nirbhaya chunga rawng taka khawsa nia hriat mi 6 man an ni a, an thubuai ngaihtuah chhungin an zinga pakhat, Ram Singh chu Tihar lung inah a intihlum a, an zinga pakhat chu kum tling lo a nih avangin nun siam\hatna hmunah kum 3 chhung dah a ni.
