Vawiin khan Bawngkawn YMA Hall-ah Commerce & Industries Minister Pu R. Romawia’n Aizawl North-I leh West-I Assembly Constituency huamchhunga chhungkaw 225 te hnenah NLUP 3rd Phase leh final installment ni bawk a sem. He NLUP sem inkhawmah hian thu sawiin Pu R. Romawia chuan tanpuina sum sem chhuah chu tam tham lo mah se, ngaihtuahna puitling tak pu chunga hlawhtlinpui ngei thei turin kalkhawmte chu a chah. Minister chuan NLUP chu chhunzawm zel a nih tur thu sawiin rahbi tleu te leh chhawmdawl ngaite kan ngaihsak zel dawn a ni, a ti a. New Economic Development Policy (NEDP) chungchang sawiin Market based Economy a ni a, chumi hnuaiah chuan thil thar chhuah dah thatna leh sawngbawlna siamte bakah hralh chhuahna turte ngaihtuah a ni dawn a ni, a ti a, sorkar hna in mi zawng zawng a daih tawh loh avangin NLUP chu chhawr tangkaia eizawnna ngelnghet leh rintlak tak siam tura theih tawp chhuah theuh turin kalkhawmte chu a chah bawk. NLUP semna inkhawm hi DIC, Aizawl Deputy Director Pu C.T Rosiama’n a kaihruai a, vawiin a NLUP tanpuina sum sem chhuah zawng zawng hi a vaiin Rs 68,73,000 a ni.
