North Korea Central Court-in South Korea chanchinbu mi pali thi turin an chungthu rel

North Korea chuan South Korea chanchinbu mi 4 chu thi turin an chungthu a rel a, hei hi South Korea khawpui, Seoul-a British chanchinbu mi pahnih lehkhabu ziah, kum 2015-a tihchhuah, “North Korea Confidential” Korean tawnga tihchhuah thar, South Korea-a chanchinbu pahnih – Chosun Ilbo leh Dong-A Ilbo-in a ennawn vang nia hriat a ni. He lehkhabu-ah hian North Korea-a sumdawnna thang mek chungchang ziah lan niin, North Korea-ah hian South Korea TV-a chhuah thin, lemchan leh ennawm chi hrang hrang leh, incheina lam thilte chu a ruka hralh a nih thin thu leh hemi kawnga North Korea mipuite’n South Korea mite khawsak phung leh nungchang an entawn nasatzia ziah lan a ni a, South Korea TV-a chhuak thin lemchan awmna, DVD emaw USB emaw neite chuan harsatna an tawh pawhin hemi hmang hian an intham chhuak thei niin a sawi bawk. North Korea chuan he lehkhabu hi a ram deusawhnaah ngaiin a haw hle a, hei vang hian he lehkhabu ennawntu, Chosun Ilbo leh Dong-A Ilbo chanchinbu-a neitu leh hnathawk mi 4-te chu thi tura hrem an ni tih North Korea Central Court chuan a puang niin an ram sorkar chanchinbu, Korean Central News Agency-in a sawi. Tun hi North Korea-in a ram thenawm leh hmelma kumhlun, South Korea mite thi tura a hrem vawi khatna a ni lo a, puan tawh angin, June thla pawh khan South Korea President hlui, Park Geun Hye-i chu thi turin a chungthu a lo rel tawh a, Park-i thuihruaite leh US intelligence-ten North Korea hruaitu lu, Kim Jong Un-a chu thah tumin an phiar ru nia sawiin, hei vang hian Park-i tihhlumna tur thupek hi a siam a ni.