North Korea-in missile pathum kap chhuak leh

North Korea-in vawiin khan missile pathum a kap chhuak leh a, South Korea chuan heng missile-te hi North Korea-a Gangwon province atanga kah chhuah a nih hnuah km 250 vela hla a thlawk niin a sawi a, missile hi America ram emaw Pacific tuifinriata US awp, Guam thliarkar emaw tan a hlauhawm pha lo niin US sipaite chuan an sawi. Korea ram sanaa tukin dar 6:49 vel khan North Korea hian a missile hi a kap chhuak niin South Korea Defence Ministry chuan a sawi a, an report siam hmasakah US sipaite chuan missile kah chhuah zinga pahnih a hlawhtling lo niin sawi mah se, a hnu lama an report-ah erawh chuan, kah chhuah a nih rualin missile pakhat a puak a, a dang pahnih chu hmarchhak lam hawiin km 250 vela thui a thlawk niin an sawi a ni. Puan tawh angin, Nilaini khan North Korea hruaitu lu, Kim Jong Un-a chuan ralthuam lam zirna leh siam chhuahna hmun, Academy of Defence Science a tlawhnaah rocket engine leh missile siam belh a rawt nia hriat a ni a, North Korea hian tun aia kap hla thei missile siam tumin a bei mek nia sawi a ni.