Aizawl khawpuia lirthei tawt lutuk tihziaawmna tura Traffic Management Coordination Committee ruahman angin October ni 2, kar leh Thawh\anni a\angin sorkar motor, mimal motor leh lirthei ke hnih nei chi zawng zawng an intlan chhawk \an dawn. Hei hi en chhinna tur a ni a, October thla chhung hman phawt a ni ang. Hemi chungchanga Traffic SP, Pu Lalthanmawia’n mipuite hriattirna a chhuah danin, lirthei tlan chhuah theih loh ni tur chu an lirthei number tawp bera number awm dan a zir a ni ang a, number 4-a tawp chu ni 4, 14 leh 24-ah an tlan chhuak thei lovang a, 0-a tawp chu ni 10, 20 leh 30 an tlan chhuak thei dawn lo a ni. Hemi chhung hian Traffic Police-te chu hmun hrang hrangah khauh takin an duty ang a, thupek zawm lote chu MV Act 179 angin mana thiam loh chantira Rs.500/- chawitir nghal zel an ni dawn a ni. Lirthei intlan chhawk tur hian a huam loh chin tur pawh siam a ni a, chungte chu Governor, CM leh Assembly Speaker leh anmahni zuitute, mihring phur chi – City bus, Maxicab, Auto Rickshaw, zirna ina hman bus, Department bus leh Department lirthei ke hnih nei chi te, Police, Excise, damdawi ina duty Ambulance, mitthi phurhna motor, Magistrate duty te, Media-a thawk MJA sticker bel te, PHE emergency duty, bawnghnute sem, chanchinbu sem, AMC bawlhhlawh paih motor, sipai leh paramilitary force motor te an ni a, Taxi te chu an intlan chhawk dan pangngaiin an intlan chhawk zel dawn a ni.
Traffic SP chuan en chhinna atana lirthei intlanchhawk chhung hian rawtna siam duh tan October ni 25 thleng, a hnenah thehluh theih niin a sawi. Traffic Management Coordination Committee ruahman anga Aizawla motor nei zawng zawngte tana garage siam theihna hun pek tawp nan ni 65 chauh a awm ta a, hun pek, ni 420 hi kumin November ni 30-ah a tawp dawn a, lirthei nei zawng zawngte chu hun an la neih, ni 65 chhunga an motor dahna tur siam vek turin Committee chuan a ngen a ni. He Committee hnuaia Working Group leh Aizawla Local Council hotute nimina Aizawl Municipal Corporation Office-a \hukhawm chuan Local Council zawng zawngte chu an veng chhung \heuha motor leh lirthei ke hnih nei chi nei zawng zawngte hre chianga, chhinchhiaha, a dahna garage an neih leh neih loh pawh October thla chhunga hre kim vek tur leh an thil hmuh dan chu Working Group hriattir vek turin ngen an ni a, lirthei neitu, a dahna garage neite chu Certificate pek an ni ang a, a nei lote erawh chu garage sakna hun pek a tawp hunah chuan an tlan chhuah ve phal a ni dawn lo a ni.
