Pakistan Mother Teresa, Sister Ruth Pfau chu kum 87 mi niin a thi

Pakistan ram Mother Teresa ti hiala sawi thin, Sister Ruth Pfau chu vawiin khan kum 87 mi niin a thi. Sister Ruth hian ui tu a ngah hle a, Pakistan ram hmun hrang hranga mi lar leh sorkar mi pawimawh tak tak te pawhin an ui thu an sawi a, tunhnaia chanchin ngah tak, Pakistan PM nih tum, cricket khel thiam hmingthang, Imran Khan pawhin Sister Ruth-i hmun ruak hi hnawhkhah leh a har hle dawn tih a sawi a ni. Sister Ruth Pfau hi kum 1929 September ni 9 khan Germany-ah a piang a, indopui pahnihna zawh hnu khan Russia awp East Germany atangin West Germany-ah an chhungkuain an tlanchhia a, Mainz-ah doctor a zir hnuin, Catholic pawl din, Society of Daughters of the Heart of Mary chu a zawm a, Pakistan-ah kum 1969 khan kalin, phar enkawl turin a inpe ta a ni. Sister Ruth hian Karachi khawpuia rel chawlhhmun hnunga phar tamna hmunah inbengbelin, damlo a enkawl thin a, kum 1963 khan phar enkawlna hmunpui, Marie Adelaide Leprosy Centre a din leh a, he damdawi in hi Afghanistan ram atang pawhin an pan thin a ni. Sister Ruth hian damdawi in awm lohna hmun a tlawhchhuak hnem hle a, hmun hrang hrangah hriselna chungchang inzirtirna leh damlo enkawl dante a zirtir thin a, hmun hrang hrangah damdawi in leh clinic a hawng bawk a ni. A hnathawh thatte avang hian Pakistan sorkar chuan kum 1988 khan a khua leh tui nihna a pe a, phar a enkawl vang hian kum 1989 khan Pakistan-in civil mite chawimawina a pek thin, Hilal-i-Pakistan chu hlan a ni bawk a, kum 2000 January ni 30, Pharte Ni, tum 47-na pualin khatih hunlaia President, Rafiq Tarar chuan Sister Ruth hi phar leh TB veite enkawlna tur a din avangin fakna thuziak a hlan bawk a, kum 2010, Pakistan zalenna ni champha, August ni 14 khan civil mi te chawimawina sang ber, Nishan-i-Quaid-i-Azam chu hlan a ni leh bawk a ni.