House of Commons rorel inkhawmah inhnialna nasa tak a chhuak a, hemi karah hian Johnson-a hian October ni 31 ral hmaa European Union chhuahsan ngei chu a la tum tih a sawi nawn a, EU leh UK in inremna an nei emaw, nei lo emaw pawh nise EU hi chhuahsan a ni ang a ti a, eptute chu mipuiten kum 2016-a EU chhuahsan tur leh tur loh thua vote hmanga thutlukna an lo siam tawh ngai pawimawh loah a puh let a ni.
UN Assembly, New York-a a hun hman tur pawt tawiin Johnson-a hi UK ah a let a, Parliament house a thlen hian conservative MP te chuan kut benga an lo lawm laiin, eptu MP te chuan an lo au nawmnah thung a ni.
Hapta 5 chhung atana Parliament a suspend-na thupek Britain Supreme Court in Thawhlehni-a a hnawl avangin Johnson-a hi New York-a a cham chen tur cham lovin a let leh a ni.
Eptu lam, Labour Party hruaitu Jeremy Corbyn chuan prime minister hi rorel turin a tlak lo a, zahawm taka amah a inhnuhdawh thuai a ngai a ni a ti a, Dan chunga leng nia inngaia Parliament a suspend chu pawm theih a ni lo a ti.
