BJP kaihhruai sorkar tungding nawn leh tura loneitute tana ruahmanna lian tham tak puang turin PM hian hma a la mek nia hriat a ni a, hemi chungchang hi nizan khan a chenna hmunah darkar 3 chhung zet mipawimawh tak takte nen an sawiho a ni. Thudawn danin PM hian Finance Minister Arun Jaitley, BJP hotupa Amit Shah leh Agriculture Minister Radha Mohan Singh te a titipui a, Finance Ministry a\anga thudawn danin sorkar chuan Parliament thlasik \hutkhawm, January ni 5-a zawh fel anih hma ngeiin loneitute tana hmathar lakna tur hi a puang chhuak dawn a ni.
State pawimawh tak tak, Madhya Pradesh, Rajasthan leh Chhatisgarh ah te BJP in hnehna a chan zawh tak loh avangin tuna PM hmalak tumna hian ngaihven a hlawh zual a, heng state-a an chak lohna chhan lian ber pakhat chu loneitute an thinrim vang nia hriat a ni a, Congress chuan heng state ah te hian thuneihna an chan rualin loneitute loan lak zawng zawng ngaihdam vek an tiam a ni.
Congress President Rahul Gandhi chuan India ram pum huapa loneitute loan ngaihdamna tur ruahmanna siam anih hma chuan Prime Minister Narendra Modi chu muthilh tir mai an tum dawn lo tih chanchinbumite hmaah a lo sawi tawh a, he chona chhang hian PM hian ruahmanna thar hi a siam ta tih BJP hruaitute chuan an sawi.
