BJP in inthlan hma a\anga an lo aupui tawh, he bill hi BJP kaihhruai sorkar chuan ngaihtuah tur zingah a chhawp chhuak dawn tih PTI in a tarlang a, sakhuana behchhan-a India khua leh tui nih theihna tur dan hi BJP kaihhruai NDA sorkar chuan term hmasa lamah khan lo pulut tawh mahse, eptu pawlte dodalna avangin Parliament ah a tlang zo lo a, pass a nih hmaa Lok Sabha dinglai hun a tawp hman avangin a thi zui a, tun \um session ah hian pass tum a ni leh dawn a ni.
He bill hmang hian Bangladesh, Pakistan leh Afghanistan-a Hindu, Jain, Christian, Sikh, Bhuddist leh Parsi te chu an awmna ramah sakhuahna avanga tihduhdah an tawrh-a India rama an tlan luh chuan India khua leh tui an nih theihna turin kawng hawnsak an ni dawn a, Assam leh hmarchhak bialte chuan an dodal nasa hle a ni.
Hmarchhak biala political party, tlawmngai pawl leh zirlaite chuan he bill hian Muslim ni lo, Hindu te a tinzawn ber nia an hriat avang leh December ni 31 2014 thlenga Hindu India rama lo lutte chu khua leh tui nihna pek theih an nih dawn avangin an dodal a, Assam Accord-a tarlan kum 1971 chin hmalam tih chu he bill hian a nuaibo dawn a ni. Mizoramah pawh Bangladesh a\anga pemlutten awlsam zawka khua leh tui an nih theih dawn avangin dodal a tawk nasa hle bawk.
Parliament thlasik \hutkhawm hi Thawh\anni a\anga \anin December ni 13 thleng tawh tura duan a ni.
Parliament thlasik \hutkhawm neih tur thlir lawk hian, Speaker Om Birla-a’n party hrang hrang hruaitute a kawm a.
|hutkhawmnaah hian Speaker chuan political party hrang hrangte chu parliament rorel tluang taka neih a nih theihna tura thawhpuiah a sawm a, Rajya Sabha Chairman M Venkaiah Naidu pawhin party hrang hrang hruaitute hi a kawm dawn a ni.
