ZEP Conference Hall Tlangnuam Aizawla neih sawihona hi MJA Gen. Hqrs. President Pu Zonunsanga Khiangte in a hawng a, thu sawiin rualban lohna nei, PwD-te tana sorkar hmalaknaah duhkhawp loh lai a la awm tih a sawi a, za-a 5 hna hauhsak an nih laia mi 59 chauh sorkar hnaa thun an la ni chu tam tawk lova a hriat thu sawiin, sorkarin ngaihtuah se a duhawm hle a ni a ti.
ZEP Director Father S. Lawrence Kennedy chuan, rualbanlote chanvo leh humhalhna dan tha tak awm tawh mah se, dante chu a bu tha tak neih ringawta hman tangkai a nih si loh chuan awmzia a awm lo a ni a ti a, sorkar department hrang hrangten rualbanlote tana an tih theihte an tih chu a pawimawh ber tih a sawi a. Chumi la hre chiang lo department thahnem tak an la awm tih a sawi bawk. Resource person atana hman advocate Lalfamkimi chuan Rights of Persons with Disabilities Act 2016 chungchanga hriat tur pawimawhte a zirtir a ni.
