PM-in budget pharh tur mipui lawm zawng siamna tur ni lo ti

Prime Minister Narendra Modi chuan kumina Budget thar pharh tur chu mipui lawm zawng siamna tur a ni dawn lo tih sawiin mipui nawlpuiin sorkar atanga a thlawna thil dawn an beisei nia sawi chu thu belhchian dawl lo a ni a ti. TV News Channel pakhatin a kawmna, nizana tih chhuahah Prime Minister chuan Sorkar chu ram kalphung siamtha turin a thawk zel dawn a, ram sum leh pai dinhmun derthawng zual ram 5 zinga tel thin India chu tunah chuan sumdawng liante mit latu ber a ni tawh a ni a ti. Prime Minister chuan pawisa note thenkhat tih thih chuan hlawhtlinna nasa tak a thlen a ni a ti a, Goods and Services Tax kalpui danah kalphung tha zawk a awm anih chuan bawhzui zel a inhuam thu a sawi a, Loneitute harsatna tawh chu a hriatpui thu sawiin, Sorkar laipui leh State sorkar ten hemi kawngah hian hmabak tam tak kan nei a ni a ti. 2019 Inthlanpui dawnah vote zawnna lam hawi Budget pharh a tum dawn em tih zawhna chhangin Prime Minister chuan Budget chungchang chu Finance Minister kuta awm anih thu sawiin, inrawlhbuai a tum loh thu a sawi a, Mipui nawlpuite chuan Sorkar rintlak leh rinngam an duh a, a thlawna thil pek an beisei nia sawi awm thin chu thil rintlak loh a ni a ti.