He hriattirna hi ECI chuan tun thla ni 18 khan Prism Party hotute thawnin, hetianga ram leh hnam in unauna tichhe thei zawnga campaign auhla an kalpui chu a nih phung chiang taka sawifiah turin an ti, a ni. He lehkha hi Prism Party-in a dawn hnuah a chhanna chu vawiin khan ECI-ah an thawn a, hetah hian Prism chuan, sorkar laipui-in Citizenship Amendment Bill kalpui a tum chu hmarchhak bial mipuite tan him lo a nih theih thu sawiin, hei hi Lok Sabha-a Pass a nih hnuah Rajya Sabha-a ngaihtuah hman a nih tak loh thu an sawi a. He Bill hi hmarchhak mipuiten nasa taka an dodal chungin BJP President, Amit Shaha chuan Assam-a vantlang inkhawma thu a sawinaah Lok Sabha inthlanpui nei tura BJP-in hnehna a chan chuan he Bill hi thar thawh leh a nih tur thu a sawi tih sawiin, hetianga ram hruaitu luten hnam leh chi hrang in unauna tichhe thei zawnga hmalak an tum thu a sawi chu an dodal tlat dawn a. Hetiang hi thil awm dan a nih avangin he Bill hi sorkar laipuiin a tharthawh leh a nih chuan Prism Party chuan Right to Secession Bill hi kalpui an tum thu an puang ve ta tih ECI-a an insawifiahnaah chuan an sawi a ni.
