MNF President, Pu Zoramthanga’n ‘Insurgency in Mizoram’ tih thupuia vuaha zirlaibua dah a ni chu tha an tih loh thu, vawiina Mizo Hnam Run Inkhawm-ah a sawi a, India-in zalenna a sualna hmasa, ‘Sepoy Mutiny’ tia dah pawh an duh loh avangin sorkar laipuiin First War of Indian Independence’ tiin a thlak nia sawiin, nakkum Assembly inthlana MNF-in thuneihna a chan chuan ‘Insurgency in Mizoram’ tih chu thlak a nih tur thu a sawi. Nationalism chungchang sawiin Pu Zoramthanga chuan, hnam thinlung put tlat chu hnam tenau leh tlem zawk tan himna awm chhun niin a sawi a, Mizoram chu hnam dang tam tak awmna ramin a hual avangin heng mite laka chim rala Mizo-te an awm loh nan inhung bikna, ILP leh ram neih dan pawh India leh MNF inremnaah ziah a ni a, he inremna ang hi ram chhungah Kashmir, Nagaland leh Mizoram chauhin an nei tih sawiin, politics hmanga inawp behna te, number-a intam hleihnate leh sum leh pai avanga ram leh hnam boral theihna laka himna awm chhun chu Nationalism a ni tih a sawi. Vawiina Mizo Hnam Run inkhawm hi Modern Higher Secondary School-a Political Science zirlaite leh an zirtirtuten an chhim a ni.
