Kenya rama eptu hruaitu, Raila Odinga chuan thla leh ni 17-a President thar thlanna buatsaih tur chu, ram danpui leh dan dangte, dik taka zawm leh lek kawh a nih dawn loh chuan chuh a tum tawh loh thu a sawi a, puan tawh angin, kar hmasa khan Kenya Supreme Court chuan thla hluia President thar thlanna chu a lo hnawl tawh a, a buatsaihtu, Electoral Commission-in ram danpui a bawhchhiat avangin, he inthlanna hi pawm theih a ni lo tih a sawi. Kha inthlanah khan President Uhuru Kenyatta chu thlan tlin leh niin Commission hian a puang a, Supreme court chuan he inthlanna hi hnawlin, November thla hma ngeia inthlan buatsaih lehna tur thupek a siam a ni. Thuthar lakhawmtute hnenah eptu hruaitu, Raila Odinga chuan, thil dik lo awm thei zawng zawng ven a nih loh chuan, inthlan that leh pawh ni se, awmzia a nei dawn chuang lo nia sawiin, a dik ngei ang tih rintlak a nih loh chuan, inhnamhnawih a tum tawh loh thu a sawi a ni. Eptu pawlte chuan, kha inthlanah khan tuten emaw, Election Commission computer server chu an khawih a, Kenyatta thlan tlin a nih theih nan an khawih chingpen niin an sawi a, court chuan, Commission hian dan a bawhchhe ngei niin a sawi na a, engtin chiah nge he inthlanna hi tihchingpen a nih erawh chu a sawi lo a ni. President Kenyatta chuan Supreme Court thutlukna chu zah hle mah se, a pawm lo tih a sawi a, Chief Justice, David Maraga chu mi dik lo nia sawiin, a tlin leh chuan Supreme Court chu khuahkhirh a tum thu a sawi a ni.
Chanchin Thar Raila Odinga’n Kenya President thar thlanna chu dang anga kalpui a nih...
