National Commission for Protection of Child Rights (NCPCR) leh Mizoram State Commission for Protection of Child Rights (MSCPCR) \angkawpin nau piang hlim leh naupang hriselna enkawl chungchanga inrawnkhawmna nimina Aizawla an buatsaih hmanpuitu Dr Thangtea hian Mizorama nausen kum khat an tlin hmaa thi zat 1000 zela 27 chu 15 ah a tla thla tawh a, hei hi ram pum huap chawhrual 1000 zela 34 aiin a hniam hle tawh a, hei aia tlahniam leh tur hian nu in nau a pai a\angin uluk taka enkawla theihtawp chhuah a pawimawh a ni a ti a. Raicheha thi zat pawh kum hmasa ah 29 an awm laiin kumin kum kal mekah 8 an ni a, raicheha thi an awm loh nan tan nasa lehzualin sorkarin \an a la dawn a ni a ti. Dr Thangtea hian thingtlang hriselna chawikang turin Health Sub-centre te tih changtlun tum a ni tih a sawi a, Health and Wellness centrea ah hlankai chhoh zel a ni a ti a, sub-centre te hi B.Sc (Nursing) zir zo tawh ngeiin an enkawl zel tawh dawn a ni a ti.
District Hospital zawng zawngah naupang daktawr, Paediatrician leh hmeichhe doctor Gynaecologist dah an nih thu leh Primary Health Centre (PHC) zawng zawngah daktawr dah kim a nih thu Dr Thangtea hian a sawi a. Aizawl Civil Hospital naupang ward ah naupang pual Intensive Care Unit (ICU) dah tum a nih thu leh Aizawl Civil Hospital ICU-ah pawh kumin chhung ngeiin khum 10 tal dah tum a ni a ti.
State level Review meeting cum Consultation on Available Facilities and Status of New Born and Paediatric Care in Mizoram-analysing the gaps and steps to improve quality of care tia vuah, nau pianghlimte enkawl kawnga hmasawnna tur sawi honaah hian MSCPCR Chairperson Pi Sangzuali Vanchhawng leh NCPCR lama mithiam Pi Shaista K. Shah te pawhin thu an sawi a, Health Dept leh Women and child development Dept-a mithiamten an hmalak mek dan an sawifiah a, hmasawnna tur rawtna \hahnem tak chhawp chhuahte chu NCPCR leh MSCPCR ten Central sorkarah leh Mizoram sorkarah te an chhawp chhuak leh dawn a ni.
