Rakhine-ah Hindu mi, 28 ruang Myanmar sipaiten hmuchhuak

Myanmar sipaiten nimin khan Rakhine state-ah Hindu mi, 28 ruang an hmu chhuak niin an sawi a, heng mite hi Bengali mi firfiak tia an koh \hin, Rohingya hel pawl, Arakan Rohingya Salvation Army-te thah niin an sawi. Myanmar sipaite sawi danin, ruang hi chirhdum pahnihah dah khawm a ni a, ruang chhar zingah hian hmeichhia leh naupang eng emaw zat an tel nia sawiin, heng mite hi Rakhine hmar lama khaw pakhata cheng niin an sawi a, hun eng emaw chen an bo tawh niin an sawi. Rakhine-a Hindu-te chuan thla hmasa ni 25 khan Rohingya hel hovin an khuaah beihpui an thlak niin an sawi a, he thil thlengah hian mi tam tak thah an nih bakah, mi eng emaw zat chu ramhnuaiah an hruai bo niin an sawi bawk. Vawiin khan sipaite chuan ruang dang pawh a awm ringin an zawng nia hriat a ni a, puan tawh angin, Rohingya hel pawlte leh sipaite inkara buaina chhuak leh avang khan Rakhine state hi pawn lam mi tan luh tlang theih loha siam a ni a, hei vang hian Myanmar sipaite thil sawi hi thu dik a ni ngei em tih finfiah a har a ni.