Rakhine state-a tharum thawhna chhuak thar lehah mi 32 thi

Myanmar rama Rakhine state hmar lamah tharum thawhna a chhuak thar leh a, Rohingya hel hovin ramria sipai hmun an beihnaah mi 32 an thi. Nizan zanlai pelh hnu-ah khan Rohingya hel 150 velin silai leh tualchher bomb hmangin police leh sipai post 20 chuang an bei a, he thil thlengah hian sipai pakhat leh police 10 an thi niin sipai hotu, Min Aung Hlaing chuan a sawi a, hel 21 pawh an thi niin a sawi bawk. Kyar Gaung Taung leh Nat Chaung khuaa police post pawh helho hian an bei nia sawi a ni a, Myanmar sorkar chuan Rohingya hel ho hi Bengali mi firfiak tiin a vuah a ni. Rohingya hnama mi thenkhat hi Arakan Rohingya Salvation Army invuahin, nikum October thla atang khan sorkar lakah an hel tan a ni. Puan tawh angin, nikum October thlaa Rakhine-a Rohingya hel hovin police post an beih hnu khan Myanmar sorkar chuan sipai chakna hmangin Rohingya ho lakah hian beihpui a thlak a, sipaite hi hleihluak taka che thinah puh an ni a, hmeichhiate an pawngsual thin bakah nausente pawh an that thin nia sawi a ni. Rakhine-a thil thleng avang hian Rohingya raltlan nuai eng emaw zat an awm tawh nia hriat a ni.