Mizoram hi hri leng darh lohna hmun, Green Zone-a awm a ni a, mipui kharkhip dan tur ruahmanna Inrinni zan-a sorkarin a tih chhuahah hmasawn nana hmalakna leh mimal eizawnnate phalna hranpa lak ngai lova kalpui phal a ni tawh a, Mizoram chhunga awmsa labour te chauh ruaia hna thawh tur a ni. Hnathawktute chu social distancing zawm chunga hna thawk tura tih an ni. Zirna in, training institute leh sakhaw biakna hmunte erawh khar chhunzawm zel a ni ang a. Inneih inkhawm leh mitthi vuina-ah mi 20 aia tam punkhawm khap chhunzawm a ni bawk.
Bazar, dawr leh hmundanga kal turte chu hmai tuamna siamsa emaw, thil dang emaw-a hmai tuam ngei tura hriattir an ni a, mi 3 aia tamin dawr pakhat an nghah phal a ni lo a, dawr nghaktu ten hmai tuamna an hmang reng tur a ni a, kut silfai uar tura hriattir an ni. Dawr neitute chu anmahni dawrtu turte dinna tur, feet ruk kar danah rin lawk tura hriattir an ni a. Dawr chhungah pawh feet ruka inhlatin awm tur a ni.
Thlai leh chawhmeh dang zuarten pawh an thil zawrhte fai taka enkawl tura hriattir an ni a, thlai, thei leh sa zawrhna tura VLTF/LLTF te’n an ruahman-ah mipui an inhnaihchilh loh nan mipui dinna tur feet ruk danah an rin tur a ni a. A tul angin bazar hmun bik kher ni lo, school kawt zawl, inkhelhna field tual leh hmun remchang dangte pawh thil zawrhna hmunah hian hman theih a ni. Damdawi dawr tiam lovin dawr dang zawng chu tlai dar 5 ah khar vek tur a ni.
Hnathawhna hmunah te kum lama upa, damlohna nei sa leh nau paite chhawr loh tur a ni a, hnathawhna hmunah te hian tum khatah mi panga aia tam thawh loh dan kawng dap tur a ni a. Tul bik thilah mi panga aia tam thawh a tul anih chuan inhlat taka awmin hna an thawk tur a ni.
Loneitu leh huan neitute, ran vulhtute, sangha dil neitute leh a thawktute pawh an hnathawhna hmunah midang nena inhlat thei ang bera thawk tura hriattir an ni a, Puanthuina, lumehna leh pheikhawk chhe siamna ang chi-ah te mi 5 aia tam awm phal a ni lo bawk.
