Bank thenkhat leh sumdawng thenkhatin cheng 10 thir an dawn duh loh vanga mi tam takin harsatna an tawh mek laiin, cheng 10 thir chu dan ang taka hman theih a nih thu Reserved Bank of India (RBI), Aizawl Sub Office hotuten Zonet an hrilh.
Tun hnaia Bank thenkhat leh sumdawngten cheng 10 thir an dawng duh lo nia sawi vanga miputen harsatna an tawh mek chungchang zawhna chhangin, RBI, Aizawl Sub Office hotute chuan, cheng 10 thir chauh ni lovin pawisa thir reng reng mipui hnena semchhuah tura duan a nih thu leh a tul a nih chuan Bank-ah pawh dah luh theih reng a nih thu an sawi a. Hun engemaw chen kalta atanga cheng 10 thir hman chungchangah mipuiin harsatna an tawh avangin RBI chuan kum 2016 November ni 20 khan cheng 10 thir chu dan ang taka hman theih a nih thu hriattirna a lo tichhuak tawh a, hetiang hriattirna hi nikum September ni 7 khan RBI, Aizawl Sub Office-in Vanglaini chanchinbu-ah Mizo tawnga a tichhuah bakah kumin Janruary ni 17 khan Mizorama Bank hrang hrang hnenah cheng 10 thir chu dawng turin a hriattir a, January ni 31-ah pawh khan State Level Banker Committee Convener SBI hnenah hriattirna a pe leh bawk a ni. RBI, Aizawl Sub Office hotute chuan, cheng 10 thir hrang hrang chu a pianphungah inan lohna awm mah se, danin a pawm vek a nih thu leh mi thenkhat thil hrechiang lovin heng pawisa thir hi a lem anga thu dik lo an thehdarh avanga hetiang harsatna hi lo thleng ta nia an hriat thu an sawi.
Aizawla Sorkar enkawl Bank thenkhat chuan an mahni enkawltu SBI-a cheng 10 thir dah luh kawngah harsatna an tawh thu Zonet an hrilh ve thung a. APEX Bank Main Branch-a Chief Manager, Pu Lalsawta Hmar chuan, an mahni dawrtute hnen atangin cheng 10 thir hi vawiin thlengin an la dawng niin a sawi a. Hetih lai hian, RBI atanga hriattirna a awm chungin, pawisa an pek chhawnna leh lak chhuahna ber SBI Main Branch-in cheng 10 thir hi a dawn duh loh avangiin harsatna an tawk mek tih a sawi thung a, tunah hian cheng 10 thir ringawt nuai 4 vel an kawl tih sawiin, Bank-in pawisa an kawl theih chin bithliah a awm bawk si avangin sem chhuah theih loh cheng 10 thir kawl vak chu an tan thil buaithlak a nih thu a sawi a, a dah thatna tur hmun pawh an neih tawh loh avangin tun dinhmunah chuan an bank-a a hlawma cheng 10 thir dahluh tumte chu an lak sak thei tawh rih lo niin a sawi.
Dak in hotute pawhin SBI Main Branch-in cheng 10 thir a dawn duh loh avanga harsatna an tawh mek thu Zonet an hrilh a. Aizawl Head Post Office-a Treasurer, Pi L. Malsawmtluangi chuan, cheng 10 thir hi Counter-ah cheng 20/30 vel an dawn bak chu a hlawma an dawn duh tawh rih loh thu leh tunah hian cheng 10 thir ringawt cheng nuai 3 vel an kawl mek thu a sawi a. Cheng 10 thir chu mipuiin an dawn duh loh avangin an Branch hrang hrangah an duh lo chunng cheng sing 4 vel theuha an sem darh thu a sawi bawk. Mizoram Rural Bank, Treasury Square Branch-a Manager, Pu C. Lallunghnema pawhin SBI-in cheng 10 thir a dawn duh loh avanga harsatna an tawk mek tih Zonet a hrilh a. Tunah hian cheng 10 thir hlir cheng sing 5 vel an khawl tawh thu leh a dah khawlna an neih tawh loh avanga a dang an lak theih tawh rih loh thu leh hetiang harsatna hi Aizawl khawpui chhunga an Branch dangte pawhin an tawh mek thu a sawi a ni.
Aizawla sumdawng thenkhat pawhin cheng 10 thir chu Bank-in a dawn duh loh avangin mipuiin an dawng duh lo ve nghal niin an sawi a. Sem chhuah theih loh kawl chu thil tih chi a nih loh avangin an ni pawhin an dawn loh phah thu an sawi a. Kohhran thenkhat chuan, cheng 10 thir hi bank-a an dah luh theih loh avangin an member-te chu thawhlawm atan cheng 10 thir thawh rih lo turin an hriattir hial nia thudawn a ni. RBI, Aizawl Sub Office hotute chuan, Bank zingah cheng 10 thir dawng duh lo an awm a nih chuan an hnenah engtik lai pawha lungawi lohna thlen theih reng a nih thu an sawi a. Dan bawhchhiate chu an nin hrem nghal thei lo mah se, Guwahati-a hotu sang lamah an lungawi lohna chu an thawn sak thei niin an sawi. State Bank of India, Aizawl Main Branch-a Asst. General Manager, Pu Binoy Bhusan Das chuan, SBI-in cheng 10 thir an dawng duh lo tih sawi awm chu a hriatpui loh thu leh a hriat chinah dawn duh loh an neih loh thu a sawi thung a. Hetiang harsatna chungchangah hian vawiin thlengin a hnena lungawi lohna thlen an la awm lo niin a sawi.
