Kar kal ta Ningani zan atanga Inrinni zan thleng khan Tlabung leh a chhehvelah ruah a sur nasat avangin Khawthlangtuipui a lian nawn leh a, Tlabung atanga ZONET thu dawn danin, he tui lian hian Tlabung khaw chhungah mihring chenna in 17 a chim a, heng zinga in 8 bungrua chu Tlabung YMA Branch hrang hrangin an thiar chhuahsak a, chhungkaw dang 9 erawh chuan anmahniin an bungrua an thiar chhuak a ni. He tui lian hian Tlabung chhehvela khaw hrang hranga mihring chenna in leh an ram te a chim bawk a, vanneihthlak takin mihring thi leh hliam an awm lova, bungraw hloh pawh a tam lo a ni. Tui lian hian Inrinni zan khan a vawrtawp a thleng a, ruah a sur zawh tawh loh avangin chak takin a kám leh tawh a, chhungkaw thenkhat chuan an bungrua an thiar lut leh tawh a ni. Tlabung khaw chhunga Dak In leh Venghlun inkar hmun hniam lai chu tui lian hian a la chim a ni.
