Russia-in UK sorkar palai mi 23 hnawtchhuak ve leh

Russia mi ram enthlatu hlui, Britain-a khawsa zui ta, Serigei Skripal leh a fanu tûr hmanga hrai chungchang thubuai kal zelah Russia Foreign Ministry chuan vawiin khan an rama awm, British sorkar palai mi 23 a hnawtchhuak. Foreign Ministry thupuangtu chuan hemi rual hian British sorkar nena zirna lama thawhdunna, British Council pawh titawp tur a nih thu leh St. Petersburg khawpuia British sorkar hmun siam tura an inbiakna kal mek pawh an tihtawp nghal thu a puang bawk a, British sorkar hnathawkte hi kar khat chhunga an ram chhuahsan tura tih an nih bakah British sorkarin an ram nek zawnga thil a tih chhunzawm zel chuan a rul tawka a chhan ve zel a tum thu a sawi bawk a ni. Russia chuan a thutlukna-te hi British ram palai, Laurie Bristow kovin a hriattir a ni. Puan tawh angin Sergei Skripal hi Russia ram tana enthlatu \hin a ni a, UK sorkar tan Russia ram hi a enthla ve leh chhawng a, UK Salisbury-ah khawsa zuiin, tun thla ni 4 khan a fanu, Yulia nen dawr pakhat kawtah nikhaw hre lova chhar an ni a, damdawi ina hruai an nih hnuah, tûr hmanga hrai an ni tih hmuhchhuah a ni a, UK Prime Minister, Theresa May chuan he inbeihnaah hian Russia a inrawlh ngeia a hriat thu leh thupetu pawh Russia President, Vladimir Putin nia a sawi hnuah, Russia ram palai 23 a lo hnawtchhuak tawh a ni.