Save Chite Lui Coordination Committee (SCLCC) chu nimin tlai khan an Patron, Larsap Lt. Gen. Nirbhay Sharma hovin Raj Bhavan-ah an thu khawm a, CM, Pu Lal Thanhawla pawh a tel a ni. Larsap chuan Chite Lui chhanchhuaka tithianghlim tura tan lakna kal zel hi India ram pum tana entawntlak khawpa thawh theih a ni, a ti a. India ram hmun tam taka an hlawhchhamnaah Mizoram chu a hlawhtlin a beisei thu sawiin, Mizo-te chu sakhaw thuhmun bia, tawng thuhmun hmang an nih bakah vantlang tana feh chhuahna kawnga inpe an nih avangin he thil pawh hi a hlawhtlin beiseina a sang hle a ni, a ti a, lui fai leh mawi buatsaih hi Mizo mipuiten Krismas thilpek atan puitlin tum se a duh thu a sawi. CM, Pu Lal Thanhawla pawhin Chite lui siam that nan khua a loa tlai lo tih sawiin, Chite lui a lo dam khawchhuah leh nan lui kama mimal ram neite leh a fintu lui te zawk kama ram neituten rilru zau tak pu-a, an ramah thing leh mau phun an phal a tul thu a sawi a, Chite luiin a luan tlang Assembly bial 8 bialtu MLA-te pawhin an MLA Local Area Development Fund hman an harsat a rin loh thu a sawi bawk. SCLCC chuan Krismas hma ngeia Mizo mipuite hnenah Chite Lui fai leh thianghlim zawk pe tura tan lakna atana tun thla ni 29 leh November 24-a Aizawl khawpui chhunga zirna in hrang hrang 24-a NSS Volunteer-te’n Chite Lui Tihfai Hnatlangpui nei se an ti a, Aizawl Bawrhsap-in Chite Lui leh a chhehvela leivung leh bawlhhlawh paih khapna thupek a chhuah bawhzui a nih dan pawh Addl. DC-in a sawi bakah, he thil hi mipui tana thil pawimawh leh an hamthatna tur a nih avangin, mipuite hnen atangin tlem lua tam lua awm lova vehbur khawn dan dap ni se an ti bawk. He thutkhawmna hi SCLCC Chairman, Chief Secretary Pu Lalmalsawma’n a kaihruai a ni.
