Mizoram Teachers Federation hi School Education Department hnuaia Teachers Service Association 10 intelkhawmna a ni a, hri leng do let nan cheng nuai 42 an thawhkhawm a, heta tang hian Ambulance 5 hi leiin Health Department hnenah an pe a. Sum hman bang an la neih cheng nuai 12 chu covid 19 do-a thawkchhuak an member te, VLTF leh LLTF ramri a duty te tanpui nan an hmang dawn a ni.
Ambulance hlanna inkhawm Secretariat pisa tuala neihah Health Minister Dr. R. Lalthangliana chuan, hri leng do nan mamawh a tam a, task force ten theihtawp an chhuah chungin sum senna tur a tam hle a ni a ti a, mi inphalte hnena tanga tanpuina sorkarin a dawng thin chu lawmawm a tih thu a sawi.
Health Minsiter hian quarantine centre-a awm mekte zingah test result la hriat loh vanga chhuah hun tawh si, la chhuak thei lova awm mek ten phunnawi lova dawhthei taka an nghak chu fakawm a tih thu a sawi a, Mizorama hri leng do dan chu state pawn lam mite pawhin tha an tih thu an sawi tih Health Minsiter hian a sawi a, mimal, pawl, Kohhran leh sorkar thawh hona that vang a ni a, Mizo hming a ti thain Mizo nih a ti nuam a ni a ti.
Education minister Pu Lalchhandama Ralte pawhin thu sawiin Mizorama zirna chhunzawm dan tur, a kaihhrawih department leh pawl aiawhten an sawiho hnuah thla thar ni 15 chu tinzawn a nih thu a sawi a, hei hi State Level Task Force ah thlen a ni tawh a, a la him love an tih chuan ruahmanna awm tawh chu tihdanglam theih a la ni tih a sawi. Hri leng vanga hun rei tak zirna kalpui theih a nih tawh loh avangin zirna kalpui theih a nih hunah zirlaiten an hriat tur angte an hriat ngei theih nan zirtirtuten pisa chawlhni-ah pawh zirna in hawn leh period tih tam an inhuam thu sorkarah an thlen tawh tih a sawi a, zirtirtute inpekna chu ropui a tih thu a sawi. Pu Lalchhandama Ralte hian Education Department hnuaia thawktuten hri leng do let nan bungrua leh tangkafai, cheng nuai 200 chuang an theh chhuak tawh tih a sawi.
Zirtirtu intelkhawmin sorkara an pek, Ambulance te hi Khawzawl District, Saitual, Champhai, Aizawl leh ZMC ah dah a ni dawn a, Dy Chief Minister Pu Tawnluia’n a vai liam a ni.
