November ni 28-a Vote tla te chu naktuk zing dar 8 a\angin Aizawl, Mamit, Kolasib, Champhai, Serchhip, Lunglei, Lawngtlai leh Siahaa Counting Hall-ah te chhiar a ni dawn ta a, He inthlannaah hian rorel lai pawl Congress-in seat 40 an chuh a, MNF-in seat 40, BJP-in seat 39, ZPM-in seat 38, Zoram tharin seat 23, PRISM-in seat 13, NPP-in seat 9 leh NCP-in seat 5 an chuh a, Independent 2 an awm bawk a ni. Lawngtlai West bial leh Hachhek bialah Independent pakhat ve ve an awm a ni. Vote thlak zawh hlima thuthar thehdarhtute zawhna chhangin Chief Minister, Pu Lal Thanhawla chuan he inthlannaah hian Indian National Congress chuan seat 27 a la dawn niin a sawi a, MNF President, Pu Zoramthanga chuan seat 25 chuang la-in a party dang puihna tel lovin sorkar a siam thei dawn niin a sawi a, ZMP Chief Minister Candidate, Pu Lalduhoma pawhin ZPM-in seat 24 vel la-in sorkar a siam thei dawn niin a sawi a ni.
He inthlannaah hian vote chhiar hma zawng chuan hmun dang a\anga Postal Ballot lut pawm a ni ang a, tun dinhmunah EVM-a vote tla chhinchhiah zat chu a pumpuiin 80.52 a tling a ni. District Hqrs. hrang hranga vote chhiar dan tur ruahman dan chuan Mamit District-a Hachhek leh Mamit biala vote tla te chu DC Office-a Counting Hall-ah chhiar a ni ang a, Dampa biala vote tla chu Local Adminstration Deptt. Hall-ah chhiar a ni ang. Kolasib District-a bial pathum, Tuirial, Kolasib leh Serluia vote tla te chu Govt. Kolasib College building-a Counting Hall-ah chhiar a ni ang a, Aizawl District-a Tuivawl, Chalfilh, |awi, Aizawl North I, Aizawl West I leh Aizawl South I biala vote tla te chu Pachhunga University College-a Counting Hall hrang hrang siamah te chhiar a ni ang. Aizawl North II leh Aizawl North III biala vote tla te chu R. Deng\huama Indoor Stadium-ah chhiar a ni ang a, Aizawl East I leh Aizawl East II biala vote tla te chu Govt. Hrangbana College-a Counting Hall-ah chhiar a ni ang. Aizawl West II leh West III biala vote tla te chu Assembly Annexe Building-ah chhiar a ni ang a, Aizawl South II leh South III biala vote tla te chu Govt. Aizawl College-ah chhiar a ni ang. Lengteng, Champhai North leh Champhai South biala vote tla te chu Champhai DC office Counting Hall-ah chhiar a ni ang a, Tuichang leh East Tuipui biala vote tla chu District Panchayat Resource Center Counting Hall-ah chhiar a ni ang a, Serchhip District-a Assembly bial thum, Serchhip, Tuikum leh Hrangturzo biala vote tla te pawh DC Office Counting Hall-ah chhiar a ni ang. Lunglei District-a Assembly bial 7 South Tuipui, Lunglei North, Lunglei East, Lunglei West, Lunglei South, Thorang leh West Tuipui biala vote tla te chu Saikuti Hall-ah chhiar a ni ang a, Lawngtlai District-a bial 3, Tuichawng, Lawngtlai West leh Lawngtlai East-a vote tla te pawh Govt. Lawngtlai College-ah vek chhiar a ni ang a, Siaha District-a Assembly bial 2, Siaha leh Palaka vote tla te pawh Govt. Siaha College Counting Hall-ah chhiar a ni ang.
