Africa khawmualpuia Sierra Leone rama lei mina thi chu mi 467 an tling tawh. Sierra Leone Deputy Health Minister, Madina Rahman chuan thi zat hi an la pun a rinawm thu leh, an chhinchhiahte hi an khawpui, Freetown bula lei min leh hmun hrang hranga tuilianin a lakte an ni tih a sawi bawk. Rahman-a chuan, chhiatna an tawh mekah hian tuihri leh sikserh a lèn loh nan, heng natna do beihpui an thlak reng a ngai tih a sawi bawk a, lei min leh chirh tawlhin a chhilhte chhanchhuah tuma beitute pawhin chirh leh tui bawlhhlawh atanga natna chi hrang hrang an kai thu sawiin, an hmanraw neihten duhthu a sam loh thu leh, tanpui an mamawh thute pawh a sawi a ni. Chhanchhuah hna thawktute chuan taksa bung hrang hrang an chhar tam hle tih sawiin, taksa peng kim hmuh inbeiseina an nei tlem tawh hle niin an sawi. Sierra Leone Cultural Affairs Minister, Sidie Yahya Tunis chuan Waterloo bulah ruang 413 vui a nih tawh thu leh, a zatve dawn lai chu naupang an nih thu a sawi a ni.
