Higher and Technical Education Department-a Technical Wing hotuten Zonet zawhna an chhan danin, Engineering Line bikah chuan harsatna awm lovin Mizoram tan allotment tihchhuah a ni tawh a, Seat 121 Mizoramin a chang a. Hetihlai hian Medical Line-ah Mizoramin seat a hmu dawn em tih hriat ala ni lo a, kumdangah chuan harsatna a awm a nih loh chuan July ni 15 velah Mizoram seat chan tur hi tihfel thin a ni a, kuminah erawh Covid 19 hri leng vanga ram pumin harsatna a tawh avangin Medical line bikah Mizoramin seat a chan tur leh tur loh hi hriat theih a la ni lo a ni.
Technical Wing hotute chuan, Mizoramin Medical College a neih tawh avangin nikum atang khan Central Pool-a Mizoramin seat a neih thin chu tihtawp a ni tawh tih an sawi a, hetihrual hian North Eastern Council (NEC) hnuaiah MBBS seat 12 Mizoram tan dah a ni a, chungte chu Imphal-a Regional Institute of Medical Sciences-ah seat 7, Shillong-a NEIGRIHMS-ah seat 3 leh Agartala Government Medical College-ah seat 2 a ni a, heng bakah hian Zoram Medical College-a MBBS seat 100 zinga seat 70 chu Mizo zirlaite tan hauh a ni bawk a. NEC hnuaiah hian BDS seat 7, BHMS seat 5, BAMS seat 2 leh BASLP seat 1 Mizoram tan dah a ni bawk.
Technical Wing hotute chuan, Central Poll-a Engineering leh Medical Course zir tur thlanna Joint Entance Examnination (JEE) leh National Eligibility Cum Entrance Test (NEET) exam turte chu tling ngei tura tanla turin an chah a. JEE hi kumin September ni 1 atanga ni 6 chhung Online hmanga exam tur a ni a, NEET chu September ni 13-ah Offline hmanga Exam a ni dawn thung.
Technical Wing hotute chuan, State Medical and Technical Entrance Examination (SMATEE) hmangin Technical Course hrang hrang zir tur pawh thlan leh a ni dawn tih an sawi a. SMATEE hnuaiah hian technical Course hrang hrang 220 chuang a awm a, exam form hi tun thla ni 31 thleng theh luh theih a ni a, exam hun tur erawh hriat theih ala ni lo tih an sawi.
