Indian Forest Amendment Bill 2019 hi British hunlaia siam The Indian Forest Act 1972 thlakna tur a ni. Pawl pathum, Zo Indigenous Forum, ZoRO leh PRISM hruaitute chuan vawiin khan chanchinbumite kawmin he dan thar tur duan mek hi sorkarin a dodal a ngai a ni an ti a, Zo Indigenous Forum hruaitu Pu C Lalremruata chuan, Draft Bill zirchiang tura Ministry in a ruat Core Committee rawtna siamte chu kumin March ni 7 khan UT leh State zawng zawngah thawn darh a nih thu sawiin zau zawka inrawnkhawmna neia an ngaihdante ni 90 chhunga thawn tura hriattir an nih thu a sawi a, Mizoram sorkarin tun thlengin hma a la la lo nia an hriat thu sawiin hun tiam ral tawh mahse \henawm state Meghalaya pawhin tunhnai khan an thawn chauh avangin Mizoram sorkar pawh inrawnkhawmna buatsaih thuai a, Core Committe hnena ngaihdan thawn thuai tura an duhthu an sawi.
Pu C Lalremruata chuan, Indian Forest Act duan tharah hian ram danpui hnuaia inhungikna Mizo ten an neih Articel 371 G chu nasa taka palzut a ni dawn niin a sawi a, Autonomous District inkaihruaina dan hrang hangte pawh a \hiat dawn a ni a ti a, Forest Officer te chu ramngaw-a lut an hmuhte an duh duha kap thei tura thuneihna hial pek an ni a, Warrant tel lovin mi inchhung luh theihna leh dap theina te pawh an nei dawn niin a sawi.
Pu C Lalremruata chuan ramngaw behchhana nungte tan he dan thar hi a him lo zual nia sawiin, tlangram lo neih te pawh tihtawp a ni dawn niin a sawi a, Mizoram tan thil pawi tur tam tak a awm niin a sawi.
