South Korea leh US sipaiten indo nun chan zir

South Korea leh US sipaiten vawiin khan computer thiamna hmangin indo nunchan an zir tan a, February thla atang khan UN hrekna hnuaiah pawh North Korea hian dollar mtd. 270 vel a la lut niin an sawi. South Korea President, Moon Jae-in chuan, he nunchan zirhona, Ulchi Freedom Guardian an tih hi an ram leh a chhehvela boruak tisosangtu tur ni lovin, mahni invenna lam hawi liau liau niin a sawi a, kum tin, hetiang hi buatsaih a nih thu leh, tu tan mah ngaihmawh tur a nih loh thu, Cabinet minister-te a hrilh a ni. US leh South Korea sipaite nunchan zirhona hian tun thla tawp thleng a awh ang a, computer thiamna hmangin, nuclear ralthuam neia hriat, North Korea nena indo tura inbuatsaih dante pawh an zir ho dawn a ni. United States pawhin an thil tih chu invenna thil niin sawi mah se, North Korea sorkar chuan inbumna niin a sawi a, hetiang thil hi a ram run tuma inbuatsaihna nia sawiin, tun hma pawhin hetiang hunah hian inhrosak nan missile leh ralthuam dangte a lo kap chhuak tawh thin a ni. North leh South Korea hi 1950 atanga 1953 thleng khan an indo a, kha indona tihtawp nan khan eng thu mah thlun a nih loh avang leh, inkahhaina chauh an siam avangin, a nihna takah chuan la indo reng ang an ni. Japan rama Kyodo news agency chuan, United Nations report, a ruka a neihah chuan, North Korea hian UN hrekna hnuaiah February thla atang khan engmah thawn chhuak lo tura tih ni mah se, he hrekna hi hêlin, kawng dang hmangin US dollar mtd. 270 hu, a thil siam a thawn chhuak niin a sawi a, UN thuchhuak lek kawh a nih dan hi a dul em avangin, United Nations-in nuclear ralthuam nei lo tura North Korea hrek a tumna pawh hi a hlawhtlin a beiseiawm tehchiam loh niin a sawi. UN Security Council chuan tun thla ni 5 khan North Korea hrek belhna hi a pass leh tawh a, hemi hma hian kum khat chhunga North Korea thil thawn chhuah, dollar tld. 3 hu vel chu hmun thuma thena hmun khat velah tihtlemsak beisei a ni a, US President Donald Trump pawhin, North Korea hian US vau zawnga thil a tih fo chuan, a ram chu meidilah a chang mai dawn niin a sawi tawh a, mahse North Korea hi Pacific tuifinriata US ram, Guam thliarkar lam hawia missile kap chhuak turin a inbuatsaih thung a, US thuchhuak ngaichangin kut erawh chu a la thlak lo a ni.