Minister leh MLA te hi khaw hrang hrangah khawlang hruaituten lo dawngsawngin an dinhmun te an lo hrilh a, lirnghing hnuhma leh thil a tih chhiatte an enfiah nghal zel a ni. Sports Minister Pu Robert Romawia Royte chuan, lirnghing tuartute chu sorkarin a ngaihsakin a tuarpui tih a sawi a, Chief Minister ruahmannaa thawk chhuak an nih thu sawiin, hmalak dan tur pawh Chief Minsiter hova ngaihtuah a ni tawh tih a sawi a, sorkar laipui pawh dawr reng an ni a ti.
Minister leh MLA te hian nimin khan khaw 4 an tlawh a, vawiin lamah khaw engemawzat an tlawh leh a, khaw hrang hranga khawtlang hruaitute hnenah silpauline leh hmanraw thenkhat bakah tangkafai tanpuina an pe a ni.
Mizoram sawrkar tirh, damdawi lam leh rilru lam doctor thiam te pawhin Tuipuiral tlangdung leh Zokhawthar te vawiin khan an
thleng chho a, medical team pathumte hi, Khawbung, Farkawn leh Zokhawthar-ah an innghat ang a, Ningani thleng khian khaw hrang hrangah lirnghing vanga rilru leh taksa lama harsatna tawk nasa zualte an endik ang a, a tul anga pek tur damdawi pawh an keng nghal tih Consultant Psychiatrist Dr C. Lalhrekima chuan Khawbunga kan corr a hrilh a ni.
