Super cyclone Amphan avanga Bangladesh thingtlang a chengte hmun him lama sawnchhuak tura tlawmngaia inpe Red Crescent volunteer pakhat chu an chuanna lawngleng a leh thut avangin tuiah a tla hlum a, cyclone Amphan vanga thihna thleng hmasa ber a ni.

A chuanna lawngleng ah hian mi 4 an chuang tih Bangladesh Red Crescent, director, Nurul Islam Khan chuan a sawi. Hetihlai hian, Bangladesh thuneitute chuan Bhasan Char thliarkara cheng Rohingya raltlan mi 306 te chu tui lianin a chim a hlauhawm avangin hmun him lamah an sawn a ni.

Sawn chhuah hna thawktute chuan cyclone hian coronavirus darh tur ven nana social distancing an hman chu a ti buai thei tih an sawi a, hetihlai hian, Bangladesh charity Oxfam, director, Dipankar Datta chuan Rohingya raltlante chu camp chep takah tui leh inthiarna in hman tawm chunga an chen ho avangin coronavirus inkaichhawn chu a hlauhawm sa tawh reng tih a sawi thung.

United Nations chuan raltlante chu Cox Bazar pawna raltlan mi maktaduai chuangte chenna hmunpuiah sawn turin a ti ve mek bawk a ni.

Bay of Bengal atanga tleh super cyclone Amphan hian Bangladesh chhim lam leh India tuipuikam chhak lam nuai tura rin a ni.