National Institute of Electronics and Information Technology leh Vantawng Group YMA tangkawpin Thenzawl Vengchhaka Tribal Girls Hostel Building-a NIELIT Computer Study Centre an buatsaih chu vawiin khan Chief Minister Pu Lal Thanhawla’n a hawng. Hawnna thu sawiin Chief Minister chuan khawvel thang chho zel mila rilru leh ngaihtuahna her rem a tura thalaite fuihin, eng kawngah pawh ei hmu tlak leh malsawmna dawng tlaka beih a pawimawh niin a sawi. Tribal Girls Hostel Building-a a hawnna inkhawm hi Vantawng Group YMA President Pu LH. Chawimawia’n a kaihruai a, NIELIT Deputy Director Pu C. Vanlalnunga leh Thenzawl Joint VC Chairman Pu H. Laldawngkima ten thu an sawi bawk. NIELIT Computer Study Centre-ah hian nitin zing, chhun leh tlaiah a thlawna Computer zir theih a ni a, Shift khatah zirlai 20-in a rualin an zir thei dawn a ni.
