Camp lian ber, Naisingpara Camp-a nimina vantlang inkhawm buatsaihah hian Dr Lalrozama chuan laklet hna kal mek chu tluang taka a kal zel theih nan, Mizoram mi leh sa let duhte chu tumah dang lova kaltir tur leh harsatna siam lo turin Camp hrang hranga awmte chu a ngen a. Tun hnai Tlangkhang Mamit District-a nupa intihthiamlohna avanga tualthihna thleng chu chi leh chi emaw hnam thil emaw a nih loh thu sawiin laklet hna thawh mek nen inkaihhnawihna nei lo a ni a ti a, hruaikir hna kal mek tih \huanawp nana hmanglo turin a ngen a ni.
District Bawrhsap chuan Mizoram mi leh sa rawn haw tawhte leh la rawn let turte chu thinlung taka an lo lawm thu a sawi bawk.
Mamit SP pawhin Mizoram mi leh sa hruaikir hna thawh mekah engmah harsatna awm lo turin venhimna kalpui a nih thu a sawi a. Hetih lai hian Camp hrang hrang aiawhte hian anmahni hruai let tur Official te leh Motor te chuan camp chhung lut rih lo se an duh thu sawiin Central Sawrkara an thil phutte chu tihhlawhtlin phawt a nih loh chuan Mizorama let an duh loh thu an sawi a ni.
Mizoram khua leh tui Lunglei leh Mamit District chhunga hruailet tawh te chu engmah harsatna nei lovin an awm lailawkna tur Temporary Shelter-ah an khawsa mek a. Anmahni chhawmdawlna tur tanpuina awm theite pawh bawrhsapten an lo hlan tawh a ni.
