Tuivai, Tuisual leh Chalfilh Group YMA te ngen angin Central YMA hruaitute chuan an President, Pu Vanlalruata hovin Tuirini lei dawh \an mek nimin khan an tlawh. Heng mite hi PWD Highway Division II-a SDO, Pu Jimmy Vanlalsiama leh a thawhpuiten an hnathawhna hmunah an lo dawngsawng a, Sesawng leh Khawruhlian inkara Tuirini lei dawhna tura lui kam sira lei ban, Pier phunna tur meter 9-a sei, meter 6-a zauva khur laih pawh an en nghal a, he lei ban phunna tur hi lei dawh lama Engineer thiam, Pu Hrangthanga Zote-in a enfiah hnuah lei ban hi phun a ni ang. Lei ban phunna tur khur laih hna leh a ban siam hna hi Contractor hran, SLT Infracon Pvt. Ltd.-in an thawk a, fur ruahtui tlak tam hma-in an phun zawh hman beisei a ni a, hetihlai hian Khawruhlian lam lui kama lei innghahna tur abutment atan lei hlui nghah chhan a rin nghal theih a, Sesawng lampanga abutment tur erawh chu siam mek a ni. Lei dawhna tur hian Chhingchhipa kawng chhuat bal laia bailey bridge dawh hman tawh loh chu \hiaha, lak thlak mek a ni a, tunah hian lei thir zangkhai deuh deuh leh a kilhna te chu Tuirini kamah phurh thlen a ni tawh a, a rit deuh te chu motor lian hire-a phurh tur niin Engineer te chuan an sawi a ni. Lui kam sir tawn tawna lei innghahna tur abutment leh lei dotu tur ban lian lui kam sir tui chim loh chin siam hna hi zawhfel a nih hunah PWD Mechanical Division chuan lei dawh hna hi a thawk ang a, lei dawh tur hi thir lei, ‘bailey bridge’ a nih dawn avangin lui kam lehlam, Sesawng lam a\anga zawma Khawruhlian lam kam thlenga nawr tawlh phei zela dawhkai tur a ni dawn a, luiah tui a tam deuh hnuah pawh harsatna a awm chuang dawn lo niin Engineer te chuan an sawi a ni. Hetihlai hian lui kam lehlam YMA Group hrang hrang pathum, Tuisual, Tuivai leh Chalfilh huam chhunga khua te chuan kumin fur ruahtui tam hun thlen hma ngeia he lei hi dawh zawh a nih loh chuan nitin khawsakna mamawh lakluh kawngah namen lovin mipuiten harsatna an tawk dawn niin an sawi a, tuna lei dawh chhunga lei chhak lama \hal laia hman theih lui kaina lei panna kawng lui kam tawn tawna siam pawh motor rit phur tan ruahsur hnua kal harsa lo tura siam turin PWD hotute an ngen a ni.
