Tun hnaia Lungei Pukpui lam mi, a pasal hnathawhna avanga Mamit District Zawlpui-a awm Pi Lalhlimpuii’n a pasal kut a tawrh avanga nunna hial a chan chu Mizoram State Commission for Women-in pawi an tih thu leh he thihnaa mawhphurtu Pi Lalhlimpuii pasal PC. Vanlalringa chu dan anga na taka hrem a nih ngei theih nan thuneitute hnenah na taka hma an lak tur thu an puang.

Thuchhuah an siamah Mizoram State Commission for Women hian, ram danpui hnuaiah Hmeichhiate nasa taka humhalhna an nih mek laia, hetiang tualthahna rapthlak tak a thleng leh, pawi khawihtu hi mihrang pawh ni lova a pasal pawm lai ngei kut tuara an hmeichhiatpui rawng taka thah a ni chu an dem hle a ni, an ti a. A pasal kut tura boral ta Pi Lalhlimpuii chunga thil rapthlak tak thleng hi Mizoram State Commission for Women chuan a tuarpuiin an lainat tak zet tih sawiin, pawikhawihtu hi na taka hrem a nih theih nan hma an lak tur thu an sawi a ni.