Pu Lalrinliana Sailo rual hian Home Minister a\anga bangta Pu R Lalzirliana chu lawmluh tura tih nimahse thil tihfel hmasak ngai \henkhat a la awm avangin lawmluh a ni rih lo. An party zawm thar te lawmluh paha thusawiin MNF President, Pu Zoramthanga chuan Congress Party chu an hotu liante nen tihdam theih an nih tawh loh avangin ICU-ah zawnluhin an awm mek niin a sawi a, luhpui ve duhloten an chhuahsan mek niin a sawi.
MNF-a lawmluh tak Pu Lalrinliana Sailo pawhin thusawiin MNF chu ram leh hnam tan hmasawnna thlentu leh mipui tan an \ha ber ang tih ringin a zawm ta niin a sawi.
Pu Lalrinliana Sailo chuan zu zawrh chu a duhlotu zinga mi a nih thu leh Assembly-a pass a nih dawn pawhin a kal lo nia sawiin zu avangin ram leh hnam Kohhranin a tuar mek niin a sawi.
Pu Lalrinliana Sailo chuan Congress chu Education lamah a hlawhchham chiang hle niin a sawi a, khaw tin deuh thawah zirna in hrang hrangah zirtirtu 1 chiah awmna a tam hle tih sawiin, MLA Fund leh khawtlang thawhkhawma zirtirtu rawih belh pawh a tam hle niin a sawi a, hei hi Education Minister vang ni lovin a pu berin zirna lam a hawi loh vang zawk niin a sawi a, tun dinhmunah Mizoram zirna chu a chhe hle niin a sawi bawk.
Home Minister hlui Pu R Lalzirliana pawhin thusawiin dinhmun zalen taka Congress-in an siam ta chu a thawventhlak hle niin a sawi a, ram leh hnam chu mihring chapona leh theihnaa chawikan chi a ni lo nia sawiin, tuna Congress sorkar chu Pathian leh kohhran zahna nei lova rorel mekah a puh bawk. Pu R Lalzirliana chuan, zu zawrh an tum hmasakin Congress Legislature Party meeting-in Kohhran rawn \ha an tih angin rawn an ni tih a sawi a, mahse kohhranin zu zawrh an rem tih ngai dawn loh thuin an lo chhang a, a hnuah Kohhran ngaihdan hre chunga zu zawrh a nih tak tho avangin Kohhran rawn leh \ul a tih tak loh thu pawh an hotute a hrilh niin a sawi a, zu zawrh erawh chu a duh lote zinga mi a nih thu leh MNF-in zu zawrh tihtawp an tum tih an sawi chu a rilrem zawng tak a ni tih a sawi bawk. Pu R. Lalzirliana chuan zu zawrhin nghawng a neih dan zirchiangtu tura ruat te report hriat a nih hnuah zu zawrh ti tawp turin nasa takin a MLA puite leh an party hotute pawh a sawipui niin a sawi a, Chief Minister pawh sawipui mahse awmzia a nei lova, tun thlengin zawrh chhunzawm zel a nih thu a sawi bawk.
He inkhawm hi an pawl Sr. Vice President, Pu Tawnluia’n a kaihruai a, hetah hian Pu Zoramthanga chuan Pu Lalrinliana Sailo bakah an party zawm thar mi engemawzat a lawmlut bawk.
