Bank hnathawk inzawmkhawm pawl, United Bank Forum Of Bank Unions-in vawiina ram pum huapa nawrh an huaihawt chu Mizorama Bank hrang hranga thawkte pawhin an zawm a, Bank khar vek a ni. State Bank of India Main Branch kawtah Bank hnathawkte hi tukin dar 9:30 vel khan an pung khawm a, National Confederation Of Bank Employees, Mizoram State Federation General Secretary, Pu C Zoliana chuan, sorkar laipuia an thil phut chungchangah tun hnai khan United Bank Forum Of Bank Unions hruaitute leh Central Labour Commissioner-te inbiakna a hlawhchham avangin an thil phut nawr zui nan nawrh hi an huaihawt ta niin a sawi. An thil phutte chu sorkar hnuaia Bank te, private Bank-a leh tumna an duh loh thu te, Bank hrang hrang chhun fin leh sawr tet tumna an duh loh thu te, sumdawng lian ho pawisa bat thai bosak an duh loh thu te, Bank-a leiba nei, an duh thu renga rul lo luite chu dan bawhchhiatna lian thama puan an phut thu te, Bank leiba, Non Performing Assets hmuh let theihna tura Parliamentary Committee rawtna tihpuitlin an phut thu te, Financial Resolution & Deposit Insurance Bill hnuh kir nghal an phut thu te, Corporate Non Performing Assets phurrit chhawk nana mipuite pawisa chawitir tihsan a nih an duh loh thu te, Bank Board Director, Employee leh Officer hmun ruak hnawh khah thuai an phut thu te, tangka note tihhlum avanga Bank hnathawkte harsatna tawh chin fel thuai an phut thu leh thil dang engemaw zat a tel a ni. Bank hnathawk nuarte hi an thil phut tihhlawhtlin phutin an au rual bawk a ni.
