US-in indo thlawhna-in Taliban ho laka beihpui a thlakah civil mi 13 thi

US-in indo thlawhna hmanga nimina Afghanistan ram khawchhak lama Logar province-a Taliban ho laka beihpui a thlakah civil mi 13 an thi niin Afghanistan sorkar houten an sawi a, Logar province Governor thupuangtu, Saleem Saleh-a sawi danin, Taliban ho hian US sipaite hi an bei hmasa a, sipaite hian an beih let hnuah helho hi Dasht-e-Bari khuaa chenna in pakhatah an biru a, US sipaite chuan indo thlawhna hmangin he in hi an bei zui ta a, he thil avang hian hel ho bihrukna ina cheng, chhungkaw member 13-in an thih phah ta a ni. Saleh-a hian thi zinga a tam zawk hi chu hmeichhia leh naupang niin a sawi a, mi dang 15 vel an hliam niin a sawi bawk. Afghanistan-a US sipaite chuan hemi chungchang hi an chhui nghal niin an sawi a, Taliban mi firfiakte laka beihpui an thlaknaa civil mi an thi chu pawi an ti hle tih sawiin, hetiang thilah hi chuan mawh an phur tih an pawm thu an sawi. Puan tawh angin, chawlhkar thum vel liam taa Nangarhar province-a US indo thlawhna-in Taliban ho a beihnaah pawh khan civil mi 11 vel an thi nia hriat a ni.