US President Donald Trump a’n North Korea hruaitu Kim Jong-un nen June ni 12-a Singapore-a inbiak an tum chu ruahman lawk anga neih a ni dawn tih a sawi a, North Korea ram aiawhin General Kim Yong-chol chuan Kim Jong-un a lehkhathawn a kuta a pek hnuah Donald Trump-a chuan he thu hi a puang a ni.
Trump-a chuan Kim Jong-un hnen a\anga lehkhathawn a dawn hi a tirah chuan a lawmawm hle tih a sawi a, a hnu lawkah a la hawng lo tih a sawi leh a, hemi hnu hian White House tuala amah kawmtu chanchinbumite hmaah June ni 12-a inbiakna neih tur chu ruahman lawk anga kalpui a ni dawn tih leh ruahmanna pawh tluang takin a kal tih a sawi a ni.
Korea ram pahnih indona mumal taka tih tawp chungchang chu an inbiakna-a an sawi dun tur zingah a tel tih Trump-a chuan a sawi a. Kum 1950-53 Korea ram pahnih indona kha inkahhai thuthung satliah hmanga tih tawp a ni a, inremna pangngai tak ziah a la awm lo a ni. June ni 12-a inbiakna ah hian North Korea in Nuclear ralthuam a tih changtlun chungchangah thu tawp siam nghal theih a ni lo mai thei tih Trump-a chuan a sawi a, hun a duh deuh anih pawhin ram pahnih inkara in hriatthiam tawnna awm chho zel chu hmasawnna pawimawh tak a ni a ti. US President Donald Trump leh North Korea hruaitu Kim Jong-un te June ni 12-a inbiak an tumna hi a tlawlh teuh hle \hin a, May ni 16 khan North Korea chu US thu puanchhuah danah a lungawi loh avangin inbiakna neih tur a \angin a inhnukdawk mai thei tih a puang a, May ni 24 ah Donald Trump chuan North Korea a hel leh avangin inbiakna neih tum chu a \hulh tih a puang a, May ni 26 ah Kim Jong-un chuan South Korea President Moon Jae-in a kawm a, June ni 1 ah North Korea palai General Kim Yong-chol a’n Kim Jong-un a lehkhathawn chu White House ah Donald Trump-a kutah a hlan a, hemi hnu hian Trump-a chuan June ni 12-a inbiakna neih tur chu kaltlangpui a ni dawn tih a sawi leh ta a ni.
