US President inthlanah Russia a inrawlh nia sawi chungchangah Trump-a campaign hotu Steve Bannon thu zawtfiah

US President thlan lai 2016 chhoah Russia a inrawlh nia sawi chungchangah Donald Trump-a campaign-puitu, chief strategist Steve Bannon chu Special Counsel Robert Mueller a’n thu a zawtfiah. Robert Mueller hi he thil chhuichiangtu tura ruat a ni a, Bannon hi President inchuh laia campaign hotupa a ni a, chumi hnuah White House ah pawh dinhmun pawimawh tak a luah chho leh a, amaherawhchu thawktu dang nena inrem lohna an neih avangin August thla khan a bansan a ni. Muller hian Trump-a campaign lai khan Russia nen inthurual rukna engemaw an nei em tih a chhui chiang mek a, hei hi Russia leh Trump-a te chuan thu belhchiandawl lo a nih thu an sawi thung a. A chhuichiangtute hian Bannona hnen atang hian thuruk pawimawh engemaw hriat chhuah theih an inbeisei a, President Trump-a’n in engvang chiahin nge FBI Director James Comey a bantir tih te pawh hriat theih an beisei a ni. Bannon hi eng thu chiah nge zawhfiah a nih hriat a ni lo a, Mueller leh a hote hian darkar 20 chhung vel an kawm nia hriat a ni.