Aizawl Mualpuia 3rd Battalion MAP Ground-a vantlang inkhawmah thusawiin, All India Congress Committee President, Pu Rahul Gandhi chuan India-a hnam leh sakhaw tlem zawkte chim rala an thuhnuaia dah chu BJP thil tum ber nia sawiin, hei hi a thlen loh nan Congress party chuan theihtawp a chhuah zel dawn a ni a ti a, BJP chu Congress party a chhiat theih nana kawng hrang hranga thawkah puhin, tun \uma Mizorama a lo tlawh turah ringawt pawh harsatna nasa tak an siam sak niin a sawi. BJP leh RSS \angkawp chuan India-a hnam tenau zawkte sakhua, \awng, culture leh nunphung tihchhiat vek chu an tum tih nghet takin a ring tih sawiin, Pu Rahul Gandhi chuan, hetiang hi a thlen loh nan Congress party chuan theihtawp a chhuah zel dawn tih a sawi a. Mizoram chu State puitling ni mah se, state dang nena khaikhin chuan mihring an tlem a, hetiang hi ni mah se, an hnam, \awng, sakhua leh culture humhalh turin dikna chanvo an nei tih an hriat a ngai a, India hi a \han zel theih nan sakhua leh hnam hrang hrangte chin dan, nunphung leh rin dan inzah sak tawn a \ul tih a sawi. AICC President chuan, Mizoramah BJP-in an duh duh an tih theih a, an chet vel theih nan MNF nen an thawk ho dawn nia a hriat thu leh he thil hian a rilru a tihnat thu a sawi a, hemi hmang hian Mizo mipui nun an tichhia ang tih a hlauh thu leh hetiang hi Mizo mipuiten a taka a thlen an remtih a rin loh thu a sawi.
Pu Rahul Gandhi chuan, RSS chu Reserved Bank of India, CBI, leh Election Commission of India rorelnaa inrawlhah puhin, Supreme Court thlengin thuneih an tum a, Supere Court Judge 4 phei chuan RSS-in an duh danin rorel turin an hrilh hial niin an sawi tih a sawi a. Hetiang taka RSS inluling hi Congress party chuan a titawp turin hma a la dawn a, Mizote sakhua, cultre, \awng leh nunphung pawh an humhalh ang a, hetiang bawk hian State dangah pawh hma an la chho zel dawn niin a sawi. Prime Minister, Pu Narendra Modi kaihhruai sorkar laipuiin Mizoram chu a duhsak lo hle chunga Mizoramin chak taka hma a sawn leh mipui thawh chhuah a pung zel chu lawmawm a tih thu sawiin, Rahul Gandhi chuan, hei hi Mizoram sorkar-in NLUP changtlung tak a kalpui vang a ni tih a chiang hle niin a sawi a. Congress party-in sorkar an siam chhunzawm chuan, \halaite tan hna thar 11,000 an siam dawn a, Sairang thleng lut tur rel kawng pawh chak lehzuala siam a ni dawn a, Falkawna State Referral Hospital behchhana Medical College din pawh tihchangtlun chhoh zel a ni dawn tih sawiin, Mizoram chu hmarchhak biala sumdawnna hmunpui atan an buatsaih dawn niin a sawi. Rahul Gandhi chuan, Mizoram mipuite tan engtiklai pawhin a inhawng reng tih sawiin, Mizoramin ram hruaitu Chief Minister pakhat a nei a, hemi piah lamah hian Delhi-ah an aiawh turin a awm tih hre turin a chah bawk.
Mizoram Pradesh Congress Committee President, Pu Lal Thanhawla pawhin thusawiin, Congress party leh BJP chu engtiklai mahin an thawk ho ngai dawn lo niin a sawi a. An Party chu BJP hian thawhpui an chak a, thawhpui turin sawm \hin mah se, an remtih dawn loh thu leh a mah chu Congress party mi a nih angin Congress mi niin a thi dawn niin a sawi a ni. Pu Lal Thanhawla chuan, Mizorama ram rotling hmasawnna reng reng Congress party thawh deuh vek a ni tih sawiin, hei hi Congress party tana mipuiten vote an thlak \hin rah chhuah a ni, a ti a. An party chu Mizorama remna leh muanna a awm theih nana hmalatu a ni tih sawiin, kohhran leh mipui duh dana lal\hutthleng an ken hnuah rambuai vanga mi harsate khai chhuah nan NLUP an sem a, hei hi vawiin thlenga chhunzawm niin, tun dinhmunah Mizoram chu India ram puma GSDP sanna ber a ni ta hial niin a sawi a ni.
